Aktau yaxınlığında “Azərbaycan Hava Yolları”na (AZAL) məxsus təyyarənin qəzaya uğraması ilə əlaqədar Braziliyanın aviasiya rəhbərliyi və “Embraer” şirkətinin nümayəndələrinin dekabrın 27-də Qazaxıstana səfəri gözlənilir.

Bu barədə Şəffaflıq.az Qazaxıstan hökumətinin mətbuat xidmətinə istinadən məlumat verir.

"Nəqliyyat Nazirliyi Azərbaycan hökuməti ilə birgə işləyir. Sabah Braziliyanın aviasiya rəhbərliyi və “Embraer” şirkətinin nümayəndələrinin gəlişi gözlənilir. Tupkaraqan rayonunda yerli miqyaslı texnogen xarakterli fövqəladə vəziyyət rejimi tətbiq edilib", - məlumatda bildirilib.

Xatırladaq ki, AZAL-a məxsus Bakı-Qroznı aviareysini həyata keçirən sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Avialaynerin göyərtəsində olan 67 nəfərdən 42-si Azərbaycan, 16-sı Rusiya, 6-sı Qazaxıstan, 3-ü isə Qırğızıstan vətəndaşı olub. Onlardan 38-i həlak olub, 29-u sağ qalıb.

Prezident İlham Əliyev çoxsaylı insan itkisindən sonra ölkə ərazisində bir günlük matəm elan olunması ilə bağlı sərəncam imzalayıb.

Eyni zamanda dövlət başçısının tapşırığı ilə təyyarə qəzasının səbəblərinin araşdırılması üçün Baş nazir Əli Əsədovun rəhbərliyi ilə Dövlət Komissiyası yaradılıb.