“Sabah” BK Azərbaycan Basketbol Liqasında müntəzəm çempionatı qalib başa vurub. XXVII turda “Gəncə”nin NTD klubunu məğlub etməsi ilə paytaxt təmsilçisi rəqibləri üçün əlçatmaz olub.

Pley-offa lider kimi yollanan kollektivin uğurlarında pay sahiblərindən biri də Mayk Edvardsdır. ABŞ-dən olan 27 yaşlı mərkəz oyunçusu “Sabah”a Kosovonun “Trepça Mitrovice” klubundan gəlib.

Edvards “Report”a müsahibəsində həm komandasının müntəzəm çempionatdakı çıxışından, həm də şəxsi hədəflərindən danışıb.

- “Sabah” Azərbaycan Basketbol Liqasında müntəzəm mövsümü lider kimi tamamladı. Komandanın çıxışını necə dəyərləndirirsiniz?

- Fikrimcə, yekun nəticə çıxışımız üçün ən yaxşı qiymətdir. Ümumi performansımıza 10 ballıq şkala ilə 9,5 bal verərdim.

- Mövsümün sonlarına doğru komandanızda bir qədər eniş yaşandı və ardıcıl məğlubiyyətlər oldu. Bunun səbəbini necə izah edə bilərsiniz?

- Uduzduğumuz bəzi oyunlara tam hazır deyildik. Amma ən vacib matçlarda qalib gəlməyin yolunu tapdıq. İdmanda qələbə ilə yanaşı məğlubiyyət də var. Odur ki, istənilən nəticəyə hazır olmalısan.

- Pley-off-da rəqib “AAAF Xırdalan” olacaq. Bu dueldən nə gözləyirsiniz?

- Hər iki komandanı çətin döyüş gözləyir. Rəqabətli oyunlar olacaq. Məqsəd finala vəsiqə qazanmaqdır. Bunun üçün əlimizdən gələni edəcəyik.

- Artıq bir neçə aydır Azərbaycandasınız. Özünüzü burada necə hiss edirsiniz?

- Burada çox rahatam. Hər şey məni qane edir. İnsanları və şəhərdəki abu-havanı sevirəm. Bir sözlə, hər şey ürəyimcədir.

- Bakıdakı həyat tərziniz barədə danışardınız. Burada ən çox sevdiyiniz və sevmədiyiniz nədir?

- Burada hər şey olduqca gözəldir. Yeməkləri, binaların görünüşünü və şəhəri kəşf etməyi xoşlayıram.

- Azərbaycan mətbəxi ilə aranızın yaxşı olduğunu bildirdiniz. Ən sevdiyiniz yeməklər hansıdır?

- Mətbəxiniz həqiqətən əladır. Bütün yeməkləri sevirəm. Heç birinə fərq qoymuram.

- “Sabah”dan öncə Kosovonun “Trepça Mitrovice” klubunda çıxış etmisiniz. Daha əvvəl isə Gürcüstanda oynamısınız. Bu üç ölkənin basketbolu arasında nə kimi fərqlər var?

- Liqalar olduqca oxşardır. Əslində onların hamısında yüksək rəqabət hissi var. Mənim üçün yeganə fərq məkandır.

- “Sabah”a keçidiniz necə baş tutdu?

- Bu komandanı mənə agentim tapdı. “Sabah”dan təklif olduğunu söylədi. Mən isə yaxınlarımla məsləhətləşdikdən sonra buraya gəlməyə qərar verdim. Qərarıma görə peşman deyiləm.

- Vikipediyada sizinlə bağlı axtarış edərkən eyni ad və soyadı daşıyan başqa bir basketbolçu qarşıma çıxdı. Amma sizinlə bağlılığı olub-olmaması barədə məlumat tapa bilmədim. Maraqlıdır, atanız və ya babanız basketbolla məşğul olub?

- Xeyr, atam vaxtilə reqbi oynayıb.

- Ondan idmanla bağlı hansı məsləhətləri alırsınız?

- Mənə hər zaman deyir ki, uğur qazanmaq üçün çox çalışmaq lazımdır.

- Atanız Azərbaycanda oynayacağınızı biləndə hansı reaksiyanı verdi?

- Xaricdə basketbol oynadığımı görəndə həyəcanlanır, bütün oyunlarımı izləyir. Yəni qeyri-adi reaksiya vermədi, hər şeyi normal qarşıladı.

Şəffaflıq.az