Hazırda peşə təhsili sahəsində analoji platformalarının yaradılması sahəsində işlər görülür.

"Report" xəbər verir ki, bunu Peşə Təhsili üzrə Dövlət Agentliyinin direktoru Ceyhun Kərəmov "Tikinti sektoru üzrə kadr hazırlığında dövlət-özəl tərəfdaşlığının rolu" mövzusunda keçirilən müzakirədə çıxışı zamanı deyib.

Onun sözlərinə görə, peşə təhsili inkişaf etməkdə olan iqtisadiyyatın tələblərinə uyğun kadr hazırlığı deməkdir:

"Kadr varsa deməli davamlılıq var. Peşə hazırlığına tələbə qəbulunda say artmaqda davam edir. 2020-ci ildən bəri bu sahədə 60 faizdən çox artım var. Misal olaraq, yeni istifadəyə verilən müəssisələrdə artıq yer yoxdur. Bu səbəbdən iki növbəli təhsilə keçmişik".

C.Kərəmov qeyd edib ki, 1 200-ə yaxın tələbə hazırda tikinti işləri üzrə təhsil alır:

"Fikrimcə bu say azdır və yeni ixtisaslar açmışıq. Bura interyer-dizayn, rəqəmsal tikinti, kran operatorluğu və s. aiddir. Təbii ki, siyahı daha da uzun ola bilər və olacaq".

Direktor vurğulayıb ki, peşə təhsilində adambaşı maliyyələşmə mexanizminə də keçid edilib.

O eyni zamanda xatırladıb ki, builki dövlət büdcəsindən peşə təhsili üçün 82.2 milyon manat vəsait ayrılıb.