Yunanıstan və Türkiyə nümayəndələri İstanbulda keçirilən görüşdə ticarət, iqtisadiyyat, nəqliyyat, təhsil, texnologiya, ətraf mühit və səhiyyə sahələrində qarşılıqlı əməkdaşlığı müzakirə ediblər.

Şəffaflıq.az xəbər verir ki, bu barədə Yunanıstan XİN məlumat yayıb.

"Türkiyə xarici işlər nazirinin müavini Burak Akçapar və Yunanıstanın xarici işlər nazirinin iqtisadi diplomatiya, xarici əlaqələr üzrə müavini Kostas Frankoyannis iki ölkə arasında əməkdaşlığın müsbət gündəliyi çərçivəsində birgə Fəaliyyət Planının müzakirələrinin 6-cı raundunu keçirmək üçün İstanbulda görüşüblər.

Görüşdə ticarət, iqtisadiyyat, nəqliyyat, təhsil, texnologiya, ətraf mühit və səhiyyə sahələrində çoxsaylı gündəm mövzularına, habelə vətəndaş cəmiyyətləri arasında münasibətlərə ətraflı baxış keçirilib. Qeyd olunub ki, bir çox məsələlər uğurla icra olunub, bir çox digər mövzularda isə qənaətbəxş irəliləyiş əldə edilib", - məlumatda bildirilir.

Dinamik və davam edən prosesdə əldə olunan əhəmiyyətli irəliləyişləri nəzərə alaraq, hər iki tərəf müsbət gündəm çərçivəsində əməkdaşlığın əlavə tematik sahələrini araşdırmaq barədə razılığa gəliblər. "Hər iki tərəf Baş nazir Kiriakos Mitsotakisin mayda Türkiyəyə qarşıdakı səfəri üçün Birgə Fəaliyyət Planı çərçivəsində konkret nəticələr təmin etmək üçün ümumi məqsədlərini təsdiqlədi", - məlumatda əlavə edilib.