İslamabad Ali Məhkəməsi (IHC) Pakistanın keçmiş Baş naziri və Pakistan Müsəlman Liqası Partiyasının (Nəvaz fraksiyası) lideri, 73 yaşlı Nəvaz Şərifə Səudiyyə Ərəbistanında “Əl-Əziziyə” polad kompleksinin alınmasına bəyan edilməmiş vəsait yatırılması işi üzrə bəraət verib.

“Report” Pakistanın “Dawn” qəzetinə istinadən xəbər verir ki, dinləmələr zamanı məhkəmə müdafiə tərəfinin sabiq hökumət başçısının bu işdə təqsirli olduğuna dair konkret sübutun olmaması ilə bağlı arqumentləri ilə razılaşıb.

“Məhkəmə siyasətçinin “Əl-Əziziyə” kompleksini satın alması ilə bağlı məsələ üzrə 2018-ci ildə çıxarılmış məhkumluq qərarını etibarsız elan edib”, - hakimlər kollegiyası bildirib.

Noyabrın sonunda IHC Londondakı “Avenfield apartment” yaşayış kompleksində mənzillərin alınması zamanı vəzifədən sui-istifadə hallarına görə N.Şərifin 10 illik həbs cəzası çəkdiyi hökmü ləğv etmişdi.

Xatırladaq ki, 2018-ci ildə N.Şərif Səudiyyə Ərəbistanındakı “Əl-Əziziyə” polad zavodunun alınmasına bəyan edilməmiş vəsait yatırmaqla bağlı korrupsiyada təqsirli bilinmişdi. İslamabad Korrupsiyaya Qarşı Mübarizə Məhkəməsi siyasətçini 7 illik həbsə məhkum etmiş və 2,5 milyon dollar cərimələmişdi.

Şəffaflıq.az