Cəlilabadda baş verən ağır qəzada ölənlərin kimliyi məlum oldu
Cəlilabadda yol-nəqliyyat hadisəsi baş verib, beş nəfər ölüb, üç nəfər isə yaralanıb. Həmin qəzada ölənlərin və yaralananların kimliyi məlum olub.
Şəffaflıq.az məlumat verir ki, hadisə zamanı VAZ-2107 markalı avtomobillə “Mitsubishi” markalı maşın toqquşub. Hadisə Cəlilabad-Yardımlı yolunun Sərhədabad kəndi ərazisindən keçən hissəsində qeydə alınıb.
Qəza nəticəsində VAZ-2107 markalı avtomobilin sürücüsü, 1966-cı il təvəllüdlü Məlikov Saleh İshaq oğlu, sərnişinlər - 1978-ci il təvəllüdlü Kərimov Elçin Xanverdi oğlu, 1970-ci il təvəllüdlü İmanova Şura Həsənağa qızı, 1995-ci il təvəllüdlü Şahbazova Gültəkin Həmzə qızı və 1975-ci il təvəllüdlü Kərimova Gülnarə Sulduz qızı hadisə yerində həlak olublar. Onların hamısı rayonun Şabanlı kənd sakinləri olub.
Qəza nəticəsində “Mitsubishi” markalı avtomobildə olan üç nəfər müxtəlif dərəcəli bədən xəsarətləri alıb. Onlar Cəlilabad rayonunun İnili kənd sakini, 1948-ci il təvəllüdlü Rəhimov Xudaş Musa oğlu, 1984-cü il təvəllüdlü Rəhimov Samir Xudaş oğlu və 2006-cı il təvəllüdlü Rəhimova Jalə Samir qızıdır. Yaralılar Cəlilabad Rayon Mərkəzi Xəstəxanasına çatdırılıblar.
Facebook-da paylaş
