Hindistanda qatarların toqquşması nəticəsində ölənlərin sayı 288 nəfərə çatıb.

Bu barədə “Reuters” məlumat yayıb.

Qeyd olunub ki, yaralananların sayı təxminən 900 nəfərə yaxındır.

Hindistanın Odişa ştatının hakimiyyət orqanları Balasore şəhəri yaxınlığındakı Bahanaq dəmir yolu stansiyası ərazisində qatarların toqquşması nəticəsində çoxsaylı insan ölümü ilə əlaqədar bir günlük matəm elan edib. Şənbə günü ştatda bütün şənlik və əyləncə tədbirlərinin keçirilməsi qadağandır.

Dəmir Yolları Nazirliyi qəzada ölənlərin yaxın qohumlarına 1 milyon rupi (12 min ABŞ dolları), ağır yaralananlara 200 min rupi (2400 ABŞ dolları), yüngül xəsarət alanlara isə 50 min rupi (604 ABŞ dolları) təzminat ödəyəcəyini açıqlayıb.

01:17

Hindistanın şərqində qatarların toqquşması nəticəsində ölənlərin sayı 120 nəfəri ötüb.

Bu barədə hadisənin baş verdiyi Odişa ştatının yanğınsöndürmə xidmətinin rəhbəri Sudxanşa Sarangi məlumat verib.

“120-dən çox cəsəd tapdıq, lakin qurbanların sayı arta bilər”, - o deyib.

Zərərçəkənlərin sayı 850 nəfərə yaxındır. Bildirilir ki, əzilmiş vaqonlarda bir neçə yüz adam qala bilər.

Qəza yerində xilasetmə əməliyyatı qaranlıqda davam edir. 350-dən çox insan artıq rayon üzrə xəstəxanalara aparılıb. Ətraf ərazilərdəki bütün özəl və dövlət səhiyyə müəssisələri həyəcan vəziyyətinə gətirilib.

23:45

İyunun 2-də Hindistanda yük qatarının sərnişin qatarı ilə toqquşması nəticəsində ölənlərin sayı artıb.

Son məlumatlara görə, qəzanın qurbanlarının sayı 70 nəfərə çatıb.

Hazırda ölənlərin sayının dəqiqləşdirildiyi bildirilir və bu rəqəmin daha da artacağı istisna olunmur.

22:36

Hindistanda cümə günü yük qatarının sərnişin qatarı ilə toqquşması nəticəsində sərnişin ekspressinin 8 vaqonu relsdən çıxıb.

Məlumata görə, qəza nəticəsində azı 50 nəfər ölüb. Hazırda ölənlərin sayı dəqiqləşdirilir. Həmçinin, 400-ə yaxın sərnişinin yaralandığı vurğulanır

Bildirilir ki, hadisə yerində axtarış-xilasetmə işləri aparılır.

Mənbə: TASS, news.ru

Şəffaflıq.az