Türkiyənin xarici işlər naziri Mövlud Çavuşoğlu BMT Baş katibinin humanitar məsələlər üzrə müavini və təcili yardım koordinatoru Martin Qriffits ilə görüşdə zəlzələ bölgəsindəki durumu müzakirə edib.

Şəffaflıq.az xəbər verir ki, bunu nazir tviterdə yazıb.

Görüşdə zəlzələnin nəticələrinin aradan qaldırılmasında BMT-nin rolu barədə fikir mübadiləsi aparılıb.

Xatırladaq ki, fevralın 6-da ocağı Türkiyənin Kahramanmaraş şəhərinin Pazarcık rayonu olan 7,7 maqnitudalı və 9 saat sonra episentri eyni şəhərin Elbistan rayonu olan 7,6 maqnitudalı iki zəlzələ olub. Güclü yeraltı təkanlardan sonra bölgədə 6,6 maqnitudayadək yüzlərlə afterşoklar qeydə alınıb. Təbii fəlakət Türkiyə və Suriyada böyük dağıntı və minlərlə itkilərə səbəb olub.

İki zəlzələ həmçinin Livan, Kipr, İraq, İsrail, İordaniya, İran və Misirdə hiss edilib.

Türkiyə Prezidenti Rəcəb Tayyib Ərdoğan ölənlərin xatirəsini anmaq üçün ölkədə 7 günlük matəm elan edib. Bundan başqa, ölkənin zəlzələ baş verən 10 şəhərində 3 aylıq fövqəladə vəziyyət elan olunub.

Bu hadisə Türkiyədə 1939-cu ildən bəri qeydə alınan ən güclü zəlzələ kimi tarixə düşüb.