Bir neçə gün əvvəl Bakının bəzi ərazilərində yüngül həyat tərzi sürən şəxslərin profilaktikasına dair ictimai təhlükəsizlik əməkdaşlarından ibarət fasiləsiz fəaliyyət göstərən xüsusi naryad qrupları yaradılıb.

Belə ki, Bakının “Fəvvarələr meydanı” və Nizami küçəsində, Nəsimi rayonu, Səməd Vurğun və Nizami küçələrinin kəsişmələrində milli-mənəvi dəyərlərimizə uyğun olmayan davranışların, ictimai əhəmiyyət kəsb edən digər neqativ halların şahidi olurduq. İctimai təhlükəsizilik əməkdaşların əsas vəzifəsi insanların bu cür mənzərə ilə qarşılaşmaması bu halların aradan qaldırılmasıdır.

Bakı Şəhər Baş Polis İdarəsinin Mətbuat Xidmətinin rəisi, polis mayoru Elşad Hacıyev Modern.az-a açıqlamasında bildirib ki, aparılan profilaktik tədbirlər öz nəticəsini verib.

“Nəzarətə götürülən yerlərdə kütləvi şəkildə əxlaqsızlıqla məşğul olan qadınlara daha rast gəlinmir”.

Bakı polisinin rəsmi nümayəndəsi profilaktik tədbirlər zamanı saxlanılan şəxslər barədə ümumi məlumatın yaxınlarda mətbuata açıqlanacağını da əlavə edib.

Qeyd edək ki, bir müddət öncə tanınmış jurnalist Nəsimi Nəbizadə sosial şəbəkə vasitəsilə daxili işlər naziri Vilayət Eyvazova müraciətində Bakının "Torqovı" adlanan məkanındakı biabırçılığın aradan qaldırılmasını xahiş etmişdi.