Yaponiyanın xarici işlər naziri Toşimitsu Moteqi azərbaycanlı həmkarı Ceyhun Bayramovla qarşıdakı danışıqların əsas mövzularını açıqlayıb.

Şəffaflıq.az xəbər verir ki, Yaponiya XİN başçısı bunu mətbuat konfransında bəyan edib.

Onun sözlərinə görə, görüş zamanı tərəflər ikitərəfli əməkdaşlıq, xüsusilə enerji məsələləri ilə yanaşı, həm də regional gündəlik - Yaxın Şərq, Cənubi Qafqaz və Hind-Sakit okeanı regionundakı vəziyyətlə bağlı ətraflı fikir mübadiləsi aparacaqlar.

"Xəzər dənizi sahilində yerləşən və dünyanın aparıcı neft və təbii qaz istehsalçılarından biri olan Azərbaycan hazırda neft yataqlarının işlənməsində Yaponiya şirkətləri ilə əməkdaşlıq edir və cari vəziyyəti nəzərə alaraq Yaponiyaya xam neft ixrac edir. Bundan başqa, Azərbaycan tərəfi Yaxın Şərqdə son gərginlik kontekstində Yaponiya vətəndaşlarının təhlükəsizliyinin təmin edilməsində mühüm dəstək göstərir, bura İrandan təxliyə edilmiş Yaponiya vətəndaşlarının qəbulu da daxildir", - o qeyd edib.

T.Moteqi həmçinin vurğulayıb ki, C.Bayramov son 17 ildə Yaponiyaya səfər edən ilk Azərbaycan xarici işlər naziridir.

Qeyd edək ki, C.Bayramovun iyunun 9-da Yaponiyaya ikigünlük rəsmi səfəri başlayıb.