Bölgədəki vəziyyət yavaş-yavaş da olsa həqiqətə tərəfə dəyişməyə başlayır.

Xatırladaq ki, Münhendə Prezident İlham Əliyev açıq şəkildə bəyan etdi ki, postmünaqişə dövründə danışıqlar iki istiqamətli yanaşma ilə həyata keçirilir.

Birinci istiqamət Bakı ilə İrəvan arasında ikitərəfli danışıqlardır ki, nəticədə iki ölkə bir-birinin ərazi bütövlüyünü, suverenliyini qarşılıqlı tanımalı və sülh müqaviləsinə imza atmalıdır.

Şəffaflıq.az-ın diplomatik mənbələrdən əldə etdiyi məlumata görə, son günlər iki ölkə Xarici İşlər Nazirliyi vasitəsilə sülh müqaviləsinin mətnlərinin mübadiləsi və onun razılaşdırılması istiqamətində işlər görülür. Lakin prosesin sürətləndirilməsi həyata keçirilməlidir.

İrəvan bu prosesə mane olan tərəfdir.

İkinci istiqamət Azərbaycanın Qarabağ iqtisadi rayonunda kompakt şəkildə yaşayan etnik erməni əsilli vətəndaşları ilə Bakı arasındakı dialoq və onların reinteqrasiyası ilə əlaqədardır.

Artıq İlham Əliyevin Münhendə söylədiyi kimi, Ruben Vardanyanın “vəzifəsindən azad edilməsindən” əvvəl Qarabağda Bakı ilə yerli erməni sakinlər arasındakı təmaslar həyata keçirilib, lakin oliqarxın bölgəyə göndərilməsindən sonra proses pozulub.

Vardanyan maneəsi aradan qaldırıldıqdan sonra təmaslar dərhal yenidən bərpa edilib.

Milli Məclisin deputatı Ramin Məmmədov Azərbaycan Respublikasının Qarabağ bölgəsində yaşayan erməni sakinlər ilə təmaslar üzrə məsul şəxs qismində müəyyən edilib.

Yeri gəlmişkən, Qarabağ erməniləri ilə danışıqlar üçün parlament xəttinin seçilməsi diplomatik olaraq doğru təyin edilmiş istiqamətdir.

Artıq millət vəkili Ramin Məmmədov Qarabağdakı etnik ermənilərin Azərbaycan dövlətinə reinteqrasiyası ilə bağlı danışıqlara başlayıb. İlk təmas artıq baş tutub və konstruktiv şəkildə keçib.

Diplomatik mənbələrdən əldə etdiyimiz məlumata görə, bu kontaktlar davam edəcək və görüş yeri kimi Bərdə, Gəncə və Ağdamın seçilməsi nəzərdə tutulur.

Müvafiq olaraq, gələcəkdə Rusiya sülhməramlı kontingentini (RSK) təmsil edən nümayəndələrin sülh danışıqlarında iştirakı planlaşdırılmır. Söhbət Azərbaycanın və onun vətəndaşlarının birbaşa dialoqunda gedir və bu təmasların istər Rusiya sülhməramlı kontingenti ilə, istərsə də digər istənilən xarici aktorlarla heç bir əlaqəsi yoxdur.

Ekofəalların Laçın yolundakı aksiyası isə öz axarında davam etməkdədir. Etirazçıların hələ də yerinə yetirilməyən tələbləri var və bu səbəbdən aksiya davam etdiriləcək.

Əslində biz fakt olaraq nə görürük? Bakı erməni əsilli vətəndaşları ilə birbaşa danışıqlar aparır, blokada mifi nəhayət süquta uğradıldı, Ruben Vardanyanın və onun tərəfdarlarının xərclədiyi pullarla qurulan “blokada və soyqırımı” gorbagor oldu.