Avropa İttifaqı avtomobillər haqqında yeni qanun qəbul edib. Bu qanuna görə avtomobillərə qara qutu texnologiyası gətiriləcək. Bununla yanaşı, hər bir avtomobildə sürət məhdudlaşdırıcı sistem olacaq. Qeyd edək ki, sürət məhdudiyyəti sistemi avropalıları çaşdırıb.

Şəffaflıq.az xarici mətbuata istinadla xəbər verir ki, Avropa Birliyi bir müddətdir ki, avtomobil sənayesinə diqqət yetirir. Belə ki, deputatlar bir müddət əvvəl qəbul etdikləri qərarla 2035-ci ilə qədər bütün qitədə daxili yanma mühərrikli nəqliyyat vasitələrini ləğv etmək qərarına gəliblər. İndi isə, Avropa İttifaqından gündəmə silkələyə biləcək yeni qərar gəlib. Qərara əsasən, Avropada satışa çıxarılan avtomobillərdə sürəti məhdudlaşdıran texnologiyaları olan “qara qutu” olmalıdır. 6 iyul 2022-ci il tarixindən etibarən buraxılan hər bir avtomobil üçün tələb olunan xüsusiyyətlər 2024-cü ilin iyul ayından etibarən məcburi olacaq.

Qanun Avropa Birliyi ölkələrinin gündəminə çevrilib. Əslində, avtomobillərdəki qara qutu məsələsini tənqid edənlər çox deyil. Çünki bu qara qutular avtomobillərin bütün məlumatlarını qeyd edəcək. Beləliklə, qara qutudakı məlumatlar sayəsində nasazlıqlardan tutmuş yol qəzalarına qədər bir çox vəziyyətə aydınlıq gətiriləcək.

Qara qutu ağlabatan olsa da, sürət həddi və xəbərdarlıq sistemi insanları narahat etməyə başlayıb. Çünki qanun avtomobillər üçün “Intelligent Speed Assistant” (ISA) adlı texnologiyanı məcburi edir. Bu texnologiya GPS məlumatlarından istifadə etməklə işləyir. Sürücülərin sürətini anında izləyən texnologiya sürət həddinin aşıldığı halda 4 fərqli qərardan birini verir. Bura vizual və ya audio siqnallar göndərmək, vibrasiya ilə bildiriş təqdim etmək, toxunma reaksiyasının təmin edilməsi və avtomobilin sürətinin avtomatik azalması daxildir.