Sosial həssas insanlara həssas yanaşma - Ödənişsiz abituriyent hazırlığı


 

Öz xeyriyyəçi vizyonu ilə fərqlənən “Fortis Academy” 2019-cu ilin sentyabr ayından etibarən Azərbaycanda analoqu olmayan bir təhsil xidməti göstərir: şəhid, qazi ailələri və sosial həssas qrupa aid olan ailələrin övladlarına tam ödənişsiz ali məktəb hazırlığı.

Belə ki, ölkəmizin aparıcı sənaye müəssisələrindən olan “Fortis Group”un təşəbbüsü və dəstəyi əsasında yaradılmış “Fortis Academy” tam xeyriyyə məqsədli bir layihədir. Başqa sözlə desək, bu layihə “Fortis Group”un Korporativ Sosial Məsuliyyətinin nəticəsidir.

“Fortis Academy” 3 ildir fəaliyyət göstərməsinə baxmayaraq əldə etdiyi yüksək nəticələr sayəsində onun fəaliyyəti ilə tanış olan hər kəsin təqdirini qazanmışdır. Belə ki, “Fortis Academy” hələ ilk ilində 70 %, 2020-2021-ci tədris ilində isə 100 %-lik nəticə göstərərək böyük uğura imza atıb.

Burada şagirdlər tam ödənişsiz təhsil almaqla yanaşı, dərs vəsaitləri, test topluları, sınaq imtahanları və nəqliyyat xidməti ilə də ödənişsiz təmin olunurlar. Hal-hazırda 20-dən çox müəllimin dəstəyi ilə 170 şagird “Fortis Academy”də onlar üçün yaradılmış əlverişli şəraitdən yararlanır. Növbəti ildə isə 225 şagirdə bu cür şəraitin yaradılması nəzərdə tutulub.

Onlar burda həm ali məktəbə daxil olmaq üçün lazım olan biliklərə yiyələnir, həm də, gələcək üçün dünyagörüşlü bir vətəndaş kimi formalaşırlar. Belə ki, onların Azərbaycanın mədəni irsi ilə də tanış olmasına, hərtərəfli bir vətəndaş kimi yetişməsinə dəstək olmaq məqsədilə muzeylərə, müxtəlif elm və mədəniyyət mərkəzlərinə müntəzəm ekskursiyalar təşkil olunur.

Təhsil ocağında mütəmadi olaraq bilik yarışları, viktorinalar, mədəniyyət və ədəbiyyatımızın sevilən simaları ilə görüşlər keçirilir.

“Fortis Academy”də şagirdlərin ali məktəb hazırlığı həm də yüksək tələbkarlıqla müşayiət olunur. Belə ki, gündəlik davamiyyətin yoxlanılması və bu barədə valideynlərin məlumatlandırılması, ev tapşırıqlarının mütəmadi yoxlanılması, həftəlik dərslərdə fəallığın qiymətləndirilməsi, müxtəlif mükafatlandırmalar və valideyn iclaslarının keçirilməsi şagirdlərin yüksək hazırlığını təmin etməyə imkan verir.

Şagirdlərə psixoloji konsultasiyaların göstərilməsi, ixtisas seçimində məsləhətlərin verilməsi və onların DİM ölçmə-qiymətləndirmə meyarlarına uyğun tematik planla təmin olunması qəbul imtahanları ərəfəsində şagirdlərin mənəvi-psixoloji vəziyyətinin yüksəldilməsinə şərait yaradır.

Bu il məzun olacaq 11-cilər keçənilki rekordu təzələmək üçün onlara yaradılmış şəraitdən maksimum faydalanır və cidd-cəhdlə çalışırlar.

Qeyd edək ki, onların yerini tutmaq və “Fortis Academy”də təhsil almaq istəyənlər üçün onlayn qeydiyyat artıq başlayıb.

“Fortis Academy” övladlarının ali məktəblərdə təhsil almasını istəyən, lakin onların hazırlığını təmin etmək üçün maddi imkanı olmayan ailələrin hər zaman yanındadır. Əgər övladınızın potensialını görür və abituriyent hazırlığında ona kömək göstərilməsini arzulayırsınızsa, qeydiyyatdan keçin.

http://fortisgroup.az/fortisacademyregister

“Fortis Academy”nin əməkdaşları tez bir zamanda sizinlə əlaqə saxlayacaq və qəbul imtahanları haqqında sizə dolğun məlumat verəcəklər.


Şəffaflıq.az


Xəbəri paylaş


Facebook-da paylaş


{sape_links}{sape_article}