"Kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı"nda kənd təsərrüfatının dayanıqlı inkişafının əsas prioritet istiqamətləri sırasında torpaq resurslarının qorunması və onlardan səmərəli istifadə olunması, eləcə də suvarma suyundan səmərəli istifadə mexanizmlərinin inkişaf etdirilməsi müəyyənləşdirilib.

Şəffaflıq.az xəbər verir ki, bunu Kənd Təsərrüfatı Nazirliyi yanında Aqrar Xidmətlər Agentliyinin Mərkəzi Laboratoriyasında vətəndaşlar, fermerlər, kənd təsərrüfatı sahəsində fəaliyyət göstərən sahibkarlar və media nümayəndələrinin iştirakı ilə təşkil olunmuş "Açıq qapı" günündə Laboratoriya Ekspertiza və Sertifikatlaşdırma Mərkəzinin (LESM) direktoru Məhəmməd Eldarov bildirib.

Onun sözlərinə görə, bu istiqamətlərdə laboratoriya xidmətlərinin imkanlarının genişləndirilməsi, fermerlərin müasir analiz xidmətlərinə çıxışının təmin edilməsi və torpaq və su resurslarının vəziyyətinin qiymətləndirilməsi mühüm əhəmiyyət daşıyır.

Tədbir çərçivəsində iştirakçılar Mərkəzi Laboratoriyanın fəaliyyəti, göstərilən xidmətlər, müasir avadanlıqlar və tətbiq olunan analiz metodları ilə tanış olublar. Torpaq analizləri üzrə azot, fosfor, kalium, pH və EC göstəricilərinin, toxum analizləri üzrə təmizlik və cücərmə göstəricilərinin, eləcə də 1000 dənin çəkisinin müəyyənləşdirilməsi prosesləri əyani nümayiş etdirilib. Həmçinin bitki xəstəliklərinin diaqnostikası, kənd təsərrüfatı məhsullarının analizi və suvarma suyunun müayinəsi ilə bağlı məlumat verilib.

Bu ilin əvvəlindən Mərkəzi Laboratoriyada torpaq üzrə 803 nümunə qəbul edilib, onlardan 783 nümunə 5-dən 11-dək parametr üzrə analiz olunub. Toxum və ting üzrə 272, bitki xəstəlikləri üzrə 262 nümunənin qəbulu və analizi həyata keçirilib. Bundan əlavə, kənd təsərrüfatı məhsullarının fitokimyəvi analizi üzrə 519, suvarma suyu üzrə isə 65 nümunə qəbul edilərək analiz olunub.

Aparılan analizlər torpaq və su resurslarının vəziyyətinin qiymətləndirilməsinə, toxum və ting materialının keyfiyyət göstəricilərinin müəyyənləşdirilməsinə, bitki xəstəliklərinin aşkarlanmasına və kənd təsərrüfatı məhsullarının müvafiq göstəricilər üzrə təhlilinə imkan verir. Bu xidmətlər fermerlərin daha düzgün və elmi əsaslandırılmış qərarlar qəbul etməsinə, resurslardan səmərəli istifadəyə və kənd təsərrüfatı istehsalının səmərəliliyinin artırılmasına xidmət edir.

Tədbir çərçivəsində iştirakçılara, həmçinin Mərkəzi Laboratoriyanın əsas fəaliyyət istiqamətləri və həyata keçirilən laborator müayinələr barədə təqdimat keçirilib. Təqdimat zamanı laboratoriyada göstərilən xidmətlər, tətbiq olunan müasir analiz metodları və əldə olunan nəticələrin kənd təsərrüfatında qərarvermə prosesində əhəmiyyəti barədə ətraflı məlumat verilib.

Təqdimatdan sonra iştirakçıları maraqlandıran sualları laboratoriya mütəxəssisləri cavablandırıb, göstərilən xidmətlər və analizlərin aparılması qaydaları ilə bağlı ətraflı məlumat verib.