ABŞ-nin Apple korporasiyası ChatGPT çat-botunu yaradan OpenAI şirkətinə qarşı məhkəmə prosesi başladıb.

Şəffaflıq.az CNBC telekanalına istinadən xəbər verir ki, bu barədə Kaliforniyanın Şimal Dairəsi məhkəməsinin elektron məlumat bazasında qeyd olunub.

Dərc edilmiş materiallardan məlum olur ki, iddia iyulun 10-da qeydə alınıb. Texnologiya nəhəngi süni intellekt tərtibatçısına qarşı kommersiya sirrindən qanunsuz istifadə ilə bağlı ittihamlar irəli sürüb.

CNBC qeyd edir ki, Apple-da belə hesab edirlər ki, onların əqli mülkiyyəti və qapalı korporativ məlumatları OpenAI tərəfindən öz proqram məhsullarının yaradılması prosesində istifadə olunub.

Məhkəmə sənədlərində göstərilir ki, süni intellekt startapına işə keçmək istəyən Apple işçilərinə guya şirkətin kommersiya sirlərini ötürmək təklif olunub.