Ekvadorlu deputat: “Azərbaycanın Qoşulmama Hərəkatındakı rolunu yüksək qiymətləndiririk”
“Azərbaycanın Qoşulmama Hərəkatında yürütdüyü siyasəti yüksək qiymətləndiririk”.
Şəffaflıq.az xəbər verir ki, bunu Ekvador parlamentinin deputatı Pamela Aquerre Qoşulmama Hərəkatı Parlament Şəbəkəsinin Bakı Konfransında çıxışı zaman deyib.
O, Azərbaycanın Qoşulmama Hərəkatında (QH) rolunu vurğulayıb:
“Azərbaycanın bu təşkilat çərçivəsində yürütdüyü siyasət başqaları üçün nümunə ola bilər. Vacib məsələləri müzakirə etmək və mümkün həll yolları tapmaq üçün bu gün, məhz bu dövlətin sayəsində bir araya gəlmişik”.
Onun sözlərinə görə, bu konfrans son dərəcə mühüm əhəmiyyət kəsb edir:
“Adətən, dövlətlər sülhü bir tərəfdən görürlər. Məsələn, mənim olduğum Latın Amerikasında daim şimala - Avropa İttifaqı və ABŞ-a doğru baxırıq. Lakin dünya daha genişdir. O, müxtəlif mədəniyyətlərdən, müxtəlif siyasi baxışlardan ibarətdir. Birlikdə olarkən ölkələrimizin problemləri haqqında danışırıq və bəzən bu problemlər üst-üstə düşür. Halbuki, bir ölkə üçün problemin məqbul həll yolu digər ölkə üçün məqbul olmaya bilər”.
P.Aquerre nümunə kimi iqlim dəyişiklikləri problemini göstərib, Ekvadorun əsasən kənd təsərrüfatı ölkəsi olduğunu, lakin yağıntıların azlığı səbəbindən bu sahədə vəziyyətin bir o qədər də ürəkaçan olmadığını bildirib:
“Bu problemi həll etmək üçün daha inkişaf etmiş və zəngin dövlətlərlə dialoqlarımız olub, çünki bu, ayrı-ayrı ölkələrin deyil, qlobal problemdir”.
Deputatın fikrincə, QHPŞ kimi platformalar problemləri müzakirə etmək və həll yolları tapmaq imkanı yaradır.
Facebook-da paylaş
