Azərbaycanda azarkeşlər və jurnalistlər üçün məhdudiyyətlər götürülüb
Azərbaycanda futbol oyunları zamanı stadionlarda azarkeş tutumunun 100% olmasına icazə verilib.
Şəffaflıq.az-ın Peşəkar Futbol Liqasının (PFL) rəsmi saytına istinadən məlumatına görə, azarkeş limiti ilə bağlı dəyişiklik sabahdan qüvvəyə minəcək.
Ümumi məsləhətləşmələrdən sonra 30 mart və 1 apreldə keçiriləcək I Divizionun XIX, 2-3 apreldə isə Premyer Liqanın XXI turunun oyunlarına stadionların tutumu qədər tamaşaçı buraxılacaq.
Eyni zamanda, jurnalistlərin fəaliyyətinin yaxşılaşdırılması ilə əlaqədar miks-zonaların təşkili bərpa olunacaq. Miks-zona qapalı məkanda olarsa, qoruyucu maskalardan istifadə edilməlidir.
Qeyd edək ki, PFL ölkədə epidemioloji vəziyyətin yaxşılaşması ilə əlaqədar xüsusi karantin rejimində yumşalma tədbirlərinin növbəti mərhələsinin tətbiqi ilə bağlı Nazirlər Kabineti yanında Operativ Qərargahın son qərarları nəzərə alıb.
Facebook-da paylaş
