Bu fikri öz açıqlamasında Milli Məclisin Əmək və sosail siyasət komitəsinin sədri, millət vəkili Musa Quliyev deyib. Onun sözlərinə görə indiyə qədər aparılan tədbirlərin nəticəsi olaraq, bu həftənin sonu karantin rejimi ləğv oluna bilərdi.

“Bu gözlənilirdi. İndiyə qədər aparılan tədbirlərə görə, bu həftənin sonunda karantin rejimi ləğv oluna bilərdi. Lakin baş verən hadisələr bu vəziyyətə öz mənfi təsirini göstərə bilər. Dünənə kimi olunan tədbirlər nəticəsində yoluxmada müəyyən stabilləşmə müşahidə olunurdu. Sağalanlarla yoluxanların sayı bir-birinə çox yaxın idi, bu da müsbət bir göstərici idi. Bununla bəlkə də ciddi karantin rejimi bitəcəkdi. Lakin dünənki hadisələrdən sonra yoluxmanın artacağı və ya azalacağı haqqında proqnoz vermək çox çətindir”.

Komitə sədri onu da bildirib ki, yay fəslində insanlar istirahət etməli və immun sistemlərini gücləndirməlidirlər: 

“Başa düşürük yay fəslidir, insanlar istirahət etməlidirlər. İnsan orqanizmi günəş şüalarından D və E vitamini qəbul etməlidir. Dənizə getməlidirlər, immun sistemləri güclənməlidir. Çünki bizi qarşıda soyuq fəsillər gözləyir. Bunun üçün bizim 2 aylıq qısa bir zamanımız var. Odur ki, mən də vəziyyəti nəzərə alaraq sizin redaksiyanız vasitəsi insanları karantin rejiminin tövsiyyələrinə əməl edib, maskalardan istifadə etməyi və sosial məsafəni gözləməyə çağırıram. Bir yerə toplu şəkildə toplaşmaq qəti qadağandır. Başa düşürəm dünənki aksiya insanların vətən, Qarabağ sevgisindən irəli gəlmişdir. Bu aksiya həm də Ali Baş Komandan İlham Əliyevə dəstək məqsədi daşıyırdı. Ancaq koronavirus pandemiyasını da nəzərdən qaçıra bilmərik”,- deyə millət vəkili qeyd edib. 

Şəffaflıq.az