"YOLUXMANIN İKİNCİ DALĞASI BAŞLAYA BİLƏR" - Qərb mediasından xəbərdarlıq
Hazırda dünyada milyonlarla insan koronavirusa görə məhdudiyyətlərin yumşaldılmasının dadını çıxarır. Amma Hindistan kimi ölkələrdə yoluxmalarda yeni tendensiya baş verir, bir günə kəskin artım var.
Bu barədə Şəffaflıq.az “The Associated Press” agentliyinə istinadən bildirir.
Dünyada əhali sayına görə Çindən sonra ikinci yerdə olan Hindistanda bazar günü 2 min 600-dən çox yeni yoluxma qeydə alınıb. Rusiyada isə yeni yoluxmalar ilk dəfə olaraq 10 mini keçib.
Hər gün Birləşmiş Ştatlarda on minlərlə yeni yoluxma baş verir, şənbə günü 1400 əlavə ölüm qeydə alınıb.
İqtisadiyyata təzyiq artır, amma...
Səhiyyə ekspertləri xəbərdarlıq edirlər ki, qadağalar yumşaldıqca yoluxmaların ikinci dalğasının başlanması mümkündür. Di gəl, dünyanın bir çox yerlərində iqtisadiyyatın yenidən başlanması üçün təzyiq artır. Axı, biznesin həftələrlə bağlanması qlobal iqtisadiyyatı 1930-cu illərdən bəri ən ağır böhrana salıb, milyonlarla iş yeri itirilib.
Elə Prezident Donald Tramp da etiraf edib ki, bəzi amerikalılar işlərini itirməkdən, bəziləri isə xəstələnməkdən qorxurlar. Çin cəmi iki yeni yoluxma halı baş verdiyini bildirir. Ölkədə beş günlük bayram mayın 5-dək davam edir və turist məkanlarına ziyarətçi sayında kəskin artım var.
Bayramın ilk iki günündə Pekində parklara 1,7 milyona yaxın insan baş çəkib. Şanxayın əsas turistik məkanlarına 1 milyondan çox ziyarətçi gedib. Bir çox məkanlar gündəlik qəbulu tutumlarının 30 faizinədək məhdudlaşdırıb.
Ağ evin koronavirus üzrə koordinatoru Deborah Briks evdə qalmaq göstərişinin bitməsinə son qoymağı tələb edən silahlı və əsasən maskasız etirazçılardan narahatlığını bildirib. Tramp da əhalini ştatlarını azad etməyə çağırmışdı.
Məhdudiyyətlər tezliklə qaldırılsa, virus ölkənin müxtəlif yerlərində kiçik dalğalarla qayıda bilər, Con Hopkins Bloomberg İctimai səhiyyə Məktəbindən Dr. Tom Inglesbey deyib. “Bu virusun dinamikasında heç nə dəyişməyib”, – o, sözlərinə əlavə edib.
Agentlik yazır ki, Birləşmiş Ştatlarda qadağaların qaldırılmasının tərəfdarları və əleyhdarları arasında ziddiyyət Konqresə də keçib.
Respublikaçıların nəzarətində olan Senat bazar ertəsi işini bərpa edir. Demokratların nəzarət etdiyi Nümayəndələr Palatası isə bağlı qalacaq.
Agentlik yazır ki, senatda çoxluğun lideri Mitç Makkonellin 100 senatoru bir araya gətirmək qərarı respublikaçı Trampa risklərə baxmayaraq işinin başına qayıdan Amerikanı vermiş olur.
“Vaksin ovu” davam edir
Xəbər verildiyi kimi dünyada yüzlərlə insan qollarını çirmələyərək vaksin sınaqlarına qoşulub. 100-ədək tədqiqat qrupu vaksin axtarışındadır. Onlarla qrup artıq insan üzərində sınağa başlayıb, bəziləri başlamalıdır.
“Biz bir-birimizlə rəqabətdə deyilik. Pandemik virusa qarşı savaşırıq, bu yarışda mümkün qədər çox oyunçu lazımdır”, – Oksford Universitetinin vaksin araşdırmasına rəhbərlik edən Dr. Andrey Pollard deyib. Bildirilir ki, vaksinlərdən hansının təhlükəsiz olacağını proqnozlaşdırmaq çətindir.
İlk testlər martda aparılıb, yan təsirləri yoxlamaq üçün azsaylı könüllülərə iynələr vurulub. Sonradan Çində, ABŞ-da və Avropada daha böyük araşdırmalar başladılıb.
Növbəti addım vaksinin həqiqətən effektiv olub-olmadığını daha böyük qruplar üzərində yoxlamaqdır. Amma bu zaman tədqiqata qoşulanlar virusun artıq səngidiyi yerlərdə yaşaya bilərlər, yaxud onlara evdə qalmaq göstərişi verilə bilər.
Siyasətçilər isə vaksin hazırlanmasına sərf olunan illəri qısaltmaq üçün planlar hazırlayırlar. Ağ evin koronovirus üzrə koordinatoru Dr. Deborah Briksdən soruşublar ki, yanvaradək vaksin əldə etmək mümkündürmü? O, bazar günü "Fox News"-un "Sunday" proqramına deyib ki, “kağız üzərində mümkündür. Amma görək bunu həyata keçirə biləcəyikmi?”.
ABŞ hökumətinin baş eksperti Dr.Anthoni Fauci isə daha ehtiyatlı danışıb. O deyir ki, hər şey əla getsə belə, vaksini 12-18 aya hazırlamaqla sürət rekordu qırmaq olar.
Milli Səhiyyə İnstitutları yanvarda COVID-19 vaksininin hazırlanmasına başlayıblar, indi vaksin Moderna Inc. ilə birlikdə sınaqdan çıxarılır.
Facebook-da paylaş
