Aslan İsmayılov: Ziya Məmmədov da xalqla məzələnib deməzdi ki,
2013-cü ildə “Gənclik”də tunelə 500 milyon ABŞ dollarından artıq xərclənməsi barədə neçə gündür ki, yüzlərlə yazıya rast gəlsəm də, hələ də dəqiqliyinə tərəddüdlə yanaşıram və hesab edirəm ki, çoxları da mənim kimi məlumatın dəqiqliyinə şübhə edirlər. Ona görə ki, normal insan ağlı bu qədər pulun necə silinməsini dərk edə bilməz.
Ağlı başında olanlar bu məbləğin nə olduğunu və dünya ölkələrinin Okeanın altından tunel çəkilşinə yüz milyon dollar civarında xərclədiyini bilirlər. Axı bu ölkədə bu qədər məbləğin silinməsi bir gecədə, gizlin baş verə bilməzdi. Bundan başqa, bu ölkədə Milli Məclis, Maliyyə, Vergilər Nazirlikləri, Hesablama Palatası, Respublika Prokurorluğu, DİN və digər dövlət strukturları fəaliyyət göstəriblər. Bu gün də bu orqanların susması, yazılanlara fikir bildirməməsi ondan xəbər verir ki, bunlar ya vəzifələrini bilmirlər, yaxud da həmin pullardan bunlara da çatıb. Əks halda, bu günə qədər fikir bildirərdilər. Ziya Məmmədov da xalqla məzələnib deməzdi ki, Ucarda mal-qara saxlayır, arpa-buğda əkir ki, dolana bilsin».
Şəffaflıq.az-ın xəbərinə görə, bunu hüquqşünas Aslan İsmayılov deyib.
“O vaxtlar Nəqliyyat naziri olmuş, adı çəkilən tikintiyə başçılıq etmiş Ziya Məmmədovun və komandasının iştahasını bildiyimdən bu məlumata tərəddüdlə yanaşıram, əks halda heç inanmazdım. Elə Bakı-Quba yoluna, Bakı-Oğuz Su kəmərinə də bunlar hər birinə təxminən 1 milyard dollar yedilər. Bakı Avtovağzalını da həzm etdilər. Elə ondan sonra gələnlər də o appetitlə yaşadılar və bu gün də yaşayırlar. Təxmini hesablamalarıma görə 500 milyon dollara bu gün Qarabağda çox gözəl, müasir bir rayon mərkəzi tikib istifadəyə vermək olardı. Bu gün mübarizə apardığım Azərbaycanın FETO-sunu da bu yırtıcılar bəslədilər və bu gün də bəsləməkdə davam edirlər. Ona görə də bu gün bu yırtıcılara qarşı aparılan əməliyyatları dayandırmaq üçün bilərəkdən yaxud bilməyərəkdən deməyin ki, "ayrı –ayrı şəxsləri tutmaqla heç nə düzələn deyil, ancaq hakimiyyəti dəyişmək lazımdır". Əlbəttə, əsas problemin sistemdə olduğunu mən də çox yaxşı başa düşürəm. Ancaq onu da bilirəm ki, bu yırtıcılar dəstəsinə layiq olduqları cəzalar verilsə, oğurladıqları qaytarılsa, yenə də cırıq şalvarda gəzməyə məcbur edilsələr, çox şey dəyişəcək. Baş verənlər bu günkülərə və gələcəkdə bu həyatı yaşamaq arzusunda olanlara da dərs olacaq» - A.İsmayılov qeyd edib.
Facebook-da paylaş
