Şamaxıda Azərbaycan satirik şeirinin ustadı M.Ə.Sabirin anadan olmasının 160 illiyi ilə əlaqədar elmi-praktik konfrans keçirilib

 İyunun 12-də Şamaxıda Rayon İcra Hakimiyyətinin və Azərbaycan Yazıçılar Birliyinin birgə təşkilatçılığı ilə “Sabir poeziya günləri” çərçivəsində Azərbaycan satirik şeirinin ustadı Mirzə Ələkbər Sabirin anadan olmasının 160 illiyi ilə əlaqədar elmi-praktik konfrans keçirilib.
 Tədbirdə Azərbaycan Yazıçılar Birliyinin sədri, xalq yazıçısı Anar, Şamaxı Rayon İcra Hakimiyyətinin başçısı Tahir Məmmədov, Milli Məclisin deputatı Tamam Cəfərova, Mirzə Ələkbər Sabir Fondunun rəhbəri Sevda Tahirli, respublikanın tanınmış şair və yazıçıları, rəssamları, habelə rayon ictimaiyyətinin nümayəndələri iştirak ediblər.
Şəffaflıq.az xəbər verir ki, tədbir iştirakçıları öncə M.Ə.Sabirin Şamaxının qədim Yeddi Gümbəz qəbristanlığındakı məzarını ziyarət edib, önünə tər çiçəklər düzüblər. Sonra böyük sənətkarın ev muzeyi ziyarət olunub. Şəhərdə ustad sənətkarın adını daşıyan parkdakı heykəlini ziyarət edən qonaqlar abidənin önünə də çiçəklər qoyublar.
Sonra tədbir Mədəniyyət Mərkəzində davam etdirilib. Azərbaycan Yazıçılar Birliyi Şirvan bölgəsinin rəhbəri, yazıçı Orxan Fikrətoğlunun aparıcılığı ilə keçirilən konfransı giriş sözü ilə açan Yazıçılar Birliyinin sədri Anar görkəmli sənətkarın satiralarını müsəlman Şərqində bir intibah, oyanış kimi qiymətləndirib, Sabir poeziyasının ölməzliyini, bənzərsiz söz ustadının fikirlərinin hər zaman aktual olduğunu diqqətə çatdıraraq yaradıcılığının Azərbaycan ədəbiyyatında mühüm yer tutduğunu vurğulayıb və onun uşaq şeirlərindən nümunələr söyləyib. Mirzə Ələkbər Sabir Fondunun rəhbəri, şairin nəvəsi Sevda Tahirli çıxışında elmi-praktik konfransın təşkilatçılarına təşəkkürünü bildirib, rəhbərlik etdiyi qurumun həyata keçirdiyi layihələr barədə məlumat verib, ustad sənətkarın 160 illiyinə həsr olunan filmin çəkildiyini və filmdə sovet dönəmində Sabir yaradıcılığına yanlış yanaşmanın olduğunu söyləyib.
İcra başçısı Tahir Məmmədov çıxışında Azərbaycan ədəbiyyatının əvəzolunmaz nümayəndəsi olan Mirzə Ələkbər Sabirə göstərilən dövlət qayğısından, ustad sənətkara olan xalq məhəbbətindən, sonsuz ehtiramdan söz açıb.
Konfransda çıxış edən “Azərbaycan” jurnalının baş redaktoru İntiqam Qasımzadə, yazıçılar İlqar Fəhmi, Azər Turan, AMEA-nın nümayəndəsi Abid Tahirli, Filologiya üzrə fəlsəfə doktoru Gülbəniz Babayeva və başqaları 1961-ci ildən başlayaraq hər il şairin doğum günündə keçirilən “Sabir poeziya günləri”nin əhəmiyyətindən danışıb, Azərbaycan ədəbiyyatının əvəzolunmaz nümayəndəsi Mirzə Ələkbər Sabirə xalq məhəbbətindən söz açıb, damarlarında azərbaycanlı qanı axan hər bir vətəndaşımız üçün onun əbədi qürur mənbəyi olduğunu vurğulayıblar.
Çıxışlarda diqqətə çatdırılıb ki, cəmiyyətdə mövcud olan bütün neqativ hallar Sabir yaradıcılığında öz əksini tapıb.
Tədbirdə gənc yazarların Mirzə Ələkbər Sabirə həsr etdikləri şeir və qəzəlləri səsləndirilib.

Xəbəri paylaş

Facebook-da paylaş


Bənzər xəbərlər
  • Mirzə Ələkbər Sabirin 159-cu doğum günü Şamaxıda qeyd olunub
  • Şamaxıda Mirzə Ələkbər Sabirin 160 illiyinə həsr olunan bədii qiraət müsabiqəsinin qalibləri mükafatlandırılıb
  • Şamaxı filialının 30 illik yubileyi və “Mirzə Ələkbər Sabir: Tarixi yaddaş və müasirlik” Respublika elmi konfransı keçirilib/-FOTO
  • Şamaxı Rayon İcra Hakimiyyətinin Başçısı və İsmayıllı Regional Mədəniyyət İdarəsinin rəisi Mirzə Ələkbər Sabirin Ev Muzeyində aparılmış təmir işləri ilə tanış olmuşlar.
  • Şamaxıda görkəmli alim Kərəmov Nurəddin Kərəm oğlunun anadan olmasının 110 illiyinə həsr olunmuş elmi-praktik konfrans keçirilib
    • {sape_links}{sape_article}