May ayının 11-də Birləşmiş Krallıqda ənənəvi olaraq təşkil edilən “Vindzor Kral Atçılıq Şousu” start götürüb.

Bu barədə Azərbaycanın Dövlət Sərhəd Xidmətinin (DSX) Mətbuat Mərkəzindən məlumat yayıb.

Bildirilib ki, Vindzor qəsrinin ərazisində keçirilən tədbirdə Azərbaycandan Britaniyaya böyük yol qət etmiş 60 nəfərdən ibarət nümayəndə heyətimizin ilk çıxışı baş tutub.

“Dumanlı Albion”un yağmurlu havasına baxmayaraq, 20 Qarabağ atı ilə DSX-nin rəqs ansamblı və süvarilər dəstəsi ölkəmizi növbəti dəfə yüksək səviyyədə təmsil edərək tamaşaçıların böyük rəğbətini qazanıb.

Nümayəndə heyətimizin təqdim etdiyi “Odlar Yurdu” adlı şou-kompozisiyanın əsasını Vindzor tamaşaçılarına çox yaxşı tanış olan, burada özünə heyranlar ordusu qazanmış, çılğınlığı və gözəlliyi ilə seçilən Qarabağ atları, eləcə də zərif Azərbaycan rəqsləri və ecazkar milli musiqimiz təşkil edib.

Heydər Əliyev Fondunun dəstəyi, Azərbaycan Atçılıq Federasiyasının təşkilatçılığı ilə hazırlanmış şou-kompozisiyanın quruluşçu rejissoru Əməkdar jurnalist Rövşən Cahangirov, xoreoqrafı DSX-nin rəqs ansamblının bədii rəhbəri, Əməkdar artist Fərid İbrahimov və süvarilər dəstəsinin quruluşçu təlimatçısı İmran Əhmədlidir.

Milli musiqi alətlərimiz tütək, zurna, balabanın ifasında “Qarabağ cəngisi”nin bənzərsiz sədalarından, “Sərhədçi” rəqs ansamblının hərarətli rəqslərindən, DSX-nin süvarilər dəstəsinin Qarabağ atları üzərində igidlik və hünər nümunələrindən, qeyri-adi perfomanslarından ibarət şou-kompozisiya Böyük Britaniya tamaşaçısını sözün əsl mənasında heyran edib. 15 dəqiqə davam edən şou müddətində süvarilərimizin Azərbaycanın və Böyük Britaniyanın dövlət bayraqlarını dalğalandırmaları xüsusi ilə diqqəti cəlb edib.

Şou-proqram tədbir iştirakçıları tərəfindən coşqu ilə qarşılanıb, böyük tamaşaçı kütləsinin zövqünü oxşamış, izləyicilər təmsilçilərimizi ayaq üstə alqışlayıblar.

Nümayəndə heyətimizin çıxışları may ayının 14-dək davam edəcəkdir.