Bakı metrosunda havalandırma sistemi yenilənir
16-02-2022, 15:25
2022-ci ildə Bakı metropolitenində daha 6 yeni güclü ventilyator quraşdırılacaq.
Bu barədə “Bakı Metropoliteni” QSC-dən məlumat verilib.
Bildirilib ki, bununla əlaqədar Rusiyanın Artyomovsk şəhərindəki “Ventprom” maşınqayırma zavodu ilə müqavilə imzalanıb. Yeni ventilyatorlar Qırmızı xəttin “Qara Qarayev-Neftçilər”, “Əhmədli-Həzi Aslanov” mənzillərində, həmçinin Yaşıl xəttin “Cəfər Cabbarlı” və “Xətai” stansiyalarının aidiyyəti sahələrində quraşdırılacaq.
Son illərdə bu istiqamətdə mühüm addımlar atılaraq, metropolitendə ventilyasiya sisteminin, o cümlədən qurğu və avadanlıqların dövrün texnoloji tələbləri səviyyəsində müasirləşdirilməsinə xüsusi diqqət yetirilir. 2018-ci ildə ventilyatorların çalışmasının dövrü qrafikinin fəsillər prinsipi ilə tənzimlənməsi, sonrakı il 7, 2020-2021-ci illərdə isə 10 yeni sənaye ventilyatorunun tətbiqi bu mənada həlledici yeniliklərdəndir.
Şəffaflıq.az
Geri qayıt