Ermənistanın Avrasiya İqtisadi İttifaqına (Aİİ) üzvlüyünün dayandırılması halında Rusiyadan ölkəyə pul köçürmələrinin həcmi yarıdan çox azalaraq 2025-ci ildəki 3,88 milyard dollarla müqayisədə 1,8 milyard dollara düşə bilər.

Şəffaflıq.az Rusiya mediasına istinadən xəbər verir ki, bu barədə Rusiya, Belarus, Ermənistan və Qazaxıstanın birgə hesabatında qeyd olunub. Sənəd Rusiya hökumətinin saytında dərc edilib.

"Bütün Aİİ ölkələrindən Ermənistana köçürmələrin ümumi göstəricisi 2025-ci ildə 3,95 milyard dollardan 1,85 milyard dollara qədər azala bilər," - sənəddə bildirilib.

Bundan əlavə, Ermənistanın Aİİ-də iştirakının dayandırılması qazın qiymətinin 1 min kubmetr üçün 177,5 dollardan 300 dollara qədər, yəni 69 % artmasına gətirib çıxara bilər.

"Ermənistanın Aİİ-yə üzv dövlətlərdən qaz idxalı üzrə ssenari qiymətləndirməsi tədarükün fiziki həcmi dəyişməz qalmaqla 1 000 kubmetr üçün 300 ABŞ dolları qiymətini nəzərdə tutur. Hazırda qüvvədə olan 177,5 ABŞ dolları baza qiyməti ilə müqayisədə artım təxminən 69 % təşkil edəcək", - hesabatda qeyd olunub.

Bununla yanaşı, bildirilib ki, bu göstərici indikativ xarakter daşıyır və bazar konyunkturası nəzərə alınmaqla real qiymət daha yüksək ola bilər.

"Leonardo Art School" və "MiniBoss Business School" 8-13 yaş arası uşaqlar üçün "Kreativ sahibkar - yaradıcılıqdan biznesə" ortaq təhsil proqramına start veriblər.

Şəffaflıq.az bu barədə "MiniBoss Business School"a istinadən xəbər verir.

Kreativ sahibkar - uşaqların yaradıcılıq və sahibkarlıq sahəsində əsas bacarıqlarını bir araya gətirmək, komanda şəklində işləmə vərdişlərini gücləndirmək və öz fikirlərini gerçəkləşdirmək yolunda ilk addımlarını atmaq üçün unikal imkandır.

İştirakçılar hər biri 4–5 nəfərdən ibarət komandalar yaradacaq və 90 akademik saatı əhatə edən təlim kursu keçəcəklər.

İştirakçılar hazırladıqları layihələri Startap Forumunda nümayiş etdirə, "MiniBoss" Milli Çempionatında yarışaraq startapın gələcək inkişafı üçün qrant qazanmaq uğrunda rəqabət apara biləcəklər.

Proqram daxilində iştirakçılar iki əsas mərhələdən keçəcəklər.

Yaradıcılıq laboratoriyası - ideyaların kəşfi, məhsulların hazırlanması, loqotipin dizaynı və brend üslubunun yaradılması.

Biznes laboratoriyası - sahibkarlığın əsas prinsipləri, hədəf auditoriya analizi, qiymət siyasətinin formalaşdırılması, biznes modelləri, marketinq və satış strategiyalarının öyrənilməsi.

Gənc iştirakçılar yaradıcı fikirlərini real məhsullara çevirə, öz startaplarını Startap Forumunda nümayiş etdirə və layihələrinin sonrakı inkişafı üçün qrant uğrunda yarışa biləcəklər. Proqramın sonunda iştirakçılara fəaliyyətlərini təsdiq edən fərdi sertifikatlar təqdim olunacaq.

Proqramın başlıca hədəfi - uşaqlara yaradıcı ideyalarını real məhsullara çevirməyi, özlərinə məxsus brendlər formalaşdırmağı və biznes layihələr hazırlamağı öyrətməkdir.

Qeyd edək ki, "MiniBoss Business School" dünyanın 27 ölkəsində 70-dən artıq filialı birləşdirən beynəlxalq miqyaslı təhsil şəbəkəsidir. Məktəbin metodologiyası 6–17 yaş arası uşaqların sahibkarlıq potensialının aşkar edilməsinə, liderlik xüsusiyyətlərinin gücləndirilməsinə və biznes düşüncə tərzinin formalaşdırılmasına istiqamətlənib.

Hər il "MiniBoss" məktəbin şagirdləri öz layihələrini Startap Forumunda nümayiş etdirir, eyni zamanda milli və beynəlxalq çempionatlarda iştirak edərək qiymətli təcrübə və yeni biliklər əldə edirlər. Proqram çərçivəsində tələbələr yalnız biznes ideyalar hazırlamır, həmçinin onların reallaşdırılması üçün qrantlar qazanır, layihələrini real biznes təşəbbüslərinə çevirir və ilk gəlirlərini əldə edirlər. Bu metod uşaqlara sahibkarlığın praktiki əsaslarını, maliyyə məsuliyyətini mənimsəməyə və gələcək biznes fəaliyyətləri üçün möhkəm bünövrə qurmağa yardım edir.

"Leonardo Art School" - yalnız bədii istedadların deyil, həm də kreativ düşüncənin, təxəyyülün və yeni yaratmaq qabiliyyətinin inkişafına yönəlmiş müasir rəssamlıq məktəblərinin beynəlxalq şəbəkəsidir. Məktəbin orijinal metodikası və müəllif proqramı vasitəsilə uşaqlar və böyüklər rəsm çəkmək, yaratmaq və obrazlı düşüncəni inkişaf etdirmək bacarıqlarını qazanırlar.

Qeydiyyat və ətraflı məlumat üçün:

• Telefon: +994 10 226 56 65

• Ünvan: Ağ Şəhər, 2-ci Yaşıl Ada küçəsi, "Təməl Park"

Azərbaycan Milli Antidopinq Agentliyi (AMADA) boksçu Daniel Holostenkonu iki il müddətinə cəzalandırıb.

Bu barədə  AMADA-dan məlumat verilib.

Bildirilib ki, idmançı tərəfindən məkan məlumatı pozuntusu aşkarlanıb.

Sanksiya avqustun 31-dən qüvvəyə minib.

Şəffaflıq.az

Bu gün "Bakı Fond Birjası" QSC-də (BFB) "FİNKA Azərbaycan" MMC bank olmayan kredit təşkilatının (BOKT) 5 milyon manatlıq faizli, təmin edilməmiş, sənədsiz, adlı istiqrazlarının 2 milyon manatlıq tranşının yerləşdirilməsi üzrə hərrac keçirilib.

Şəffaflıq.az BFB-yə istinadən xəbər verir ki, hərraca hər birinin nominal dəyəri 100 manat olan 20 000 ədəd istiqraz çıxarılıb.

Qiymətli kağızlar birqiymətli hərrac üsulu ilə investorlara təklif olunub. İstiqrazlara 50 investor ümumi məbləği isə 2 milyon manat olan 50 sifariş təqdim edib. Bununla da, yerləşdirmə tam baş tutub.

Qiymətli kağızlar 18 ay tədavüldə olacaq. Onların illik gəlirliliyi 15 %-dir. Faizlər rüblük ödəniləcək. Prosesin anderrayteri "Unicapital İnvestisiya Şirkəti" ASC-dir.

Azərbaycanda ali təhsil imkanları Astana və Almatıda IEF 2026 Beynəlxalq təhsil sərgisində təqdim edilib.

Şəffaflıq.az xəbər verir ki, sərgidə Elm və Ali Təhsil üzrə Dövlət Agentliyinin, "Study in Azerbaijan" layihəsinin və Azərbaycan Dövlət Neft və Sənaye Universitetinin nümayəndələri iştirak ediblər.

Ziyarətçilərə xarici tələbələr üçün Azərbaycan ali məktəblərinin akademik proqramları, qəbul qaydaları və təqaüd imkanları barədə məlumat verilib. Ümumilikdə iki şəhərdəki sərgiləri 3 mindən çox insan ziyarət edib.

Səfər çərçivəsində həmçinin Astana və Almatı məktəblərinin yuxarı sinif şagirdləri ilə görüşlər keçirilib. Onlara Azərbaycanda təhsil imkanları, universitetlərə qəbul, ixtisas seçimi və xarici tələbələrə dəstək barədə məlumat təqdim edilib, həmçinin şagirdlərin sualları cavablandırılıb.

Yaxın günlərdə Azərbaycan nümayəndələri Bişkek və Daşkənddə təhsil sərgilərində iştirak etməyi və görüşlər keçirməyi planlaşdırırlar.

Türkiyənin İstanbul və Kocaeli şəhərlərində aramsız yağışlar səbəbindən baş verən sel fəlakəti səbəbindən ölənlərin sayı 10-a çatıb.

Şəffaflıq.az xəbər verir ki, bu barədə NTV məlumat yayıb.

Qeyd olunub ki, İstanbulda axtarışları davam edən daha bir nəfərin nəşi sel sularından çıxarılıb, bununla da ölənlərin sayı Kocaelidə 3, İstanbulda isə 7-yə yüksəlib.

Xatırladaq ki, son günlər Türkiyənin bəzi şəhərlərində davam edən aramsız yağışlar ciddi fəsadlara yol açıb. Evlərə və infrastruktura külli miqdarda zərər dəyib.

İrandan Azərbaycana narkotik keçirilməsinin qarşısı alınıb.

Bu barədə Dövlət Sərhəd Xidmətindən məlumat verilib.

Bildirilib ki, Sərhəd Qoşunlarının "Lənkəran" sərhəd dəstəsinin xidməti ərazisində narkotik vasitələrin qaçaqmalçılıq yolu ilə İrandan Azərbaycana keçirilməsinin qarşısı alınıb.

Oktyabr ayının 18-də keçirilmiş sərhəd axtarışı və əməliyyat tədbirləri nəticəsində ümumi çəkisi 6 kiloqram 485 qram olan narkotik vasitə aşkarlanaraq qanunsuz dövriyyədən çıxarılıb.

Fakt üzrə əməliyyat-istintaq tədbirləri davam etdirilir.

Şəffaflıq.az

Əmək və Əhalinin Sosial Müdafiəsi Nazirliyinin (ƏƏSMN) tabeliyində Dövlət Sosial Müdafiə Fondu tərəfindən respublika üzrə oktyabr ayının pensiya ödənişləri yekunlaşdırılıb.

Bu barədə ƏƏSMN-dan məlumat verilib.

Bildirilib ki, oktyabrın 7-də Naxçıvan Muxtar Respublikası, oktyabrın 14-də Bakı, Sumqayıt şəhərləri və Abşeron rayonu, bu gün isə ölkəmizin bölgələrində qeydiyyatda olan şəxslərin oktyabr ayı üzrə pensiyaları, habelə güzəştli şərtlərlə təyin edilmiş pensiyalar ödənilib.

Şəffaflıq.az

Hərbi xidmət əleyhinə olan inzibati xətalar üzrə prokuror nəzarəti gücləndirilir.

Şəffaflq.az xəbər verir ki, bununla bağlı İnzibati Xətalar Məcəlləsinə dəyişiklik təklif edilir.

Layihə Milli Məclisin Hüquq siyasəti və dövlət quruculuğu komitəsinin bugünkü iclasında müzakirəyə çıxarılıb.

Qeyd edilib ki, hazırkı qanunvericilikdə müvafiq qurumun hərbi qulluqçuları tərəfindən törədilmiş hərbi xidmət əleyhinə olan inzibati xətalar üzrə, səlahiyyətli şəxs hərbi prokurora yazılı məlumat verməklə kifayətlənir.

Təklif olunan qanun layihəsi isə müvafiq qərarların (qərardadların), protokolların surətlərinin hərbi prokurora göndərilməsini təsbit etməklə bərabər, prokurorun həmin sənədlər üzrə müvafiq hərəkətlər etmək və qərar qəbul etmək səlahiyyətlərini də nəzərdə tutur.

Yuxarıda adı çəkilən inzibati xətalar üzrə prokurorun qərar qəbul etmək səlahiyyəti müəyyənləşdiyindən, həmin işlərə baxılmasında prokurorun iştirakını təmin edən İnzibati Xətalar Məcəlləsinin 54.6-cı maddəsinə müvafiq müddəanın əlavə edilməsi təklif edilir.

Müddəada qeyd edilir ki, müvafiq icra hakimiyyəti orqanının müəyyən etdiyi orqanın (qurumun) hərbi qulluqçuları tərəfindən törədilmiş hərbi xidmət əleyhinə olan inzibati xətalar üzrə müvafiq icra hakimiyyəti orqanının müəyyən etdiyi orqanın (qurumun) səlahiyyətli vəzifəli şəxsi tərəfindən qəbul edilmiş qərarların (qərardadların), habelə protokolların surətləri dərhal müvafiq hərbi prokurora göndərilir. Hərbi prokuror həmin aidiyyəti sənədlərin yoxlanılması ilə qanuni əsaslar olduqda yazılı göstəriş verir.

Vurğulanıb ki, hərbi prokuror səlahiyyətli orqanın (vəzifəli şəxsin) inzibati xəta haqqında işin başlanılmasının rədd edilməsi haqqında qərardadının və ya inzibati xəta haqqında iş üzrə icraata xitam verilməsi haqqında qərarının qanuniliyini və əsaslılığını onun daxil olduğu vaxtdan 30 gün müddətində yoxlayır, həmin qərardadın və ya qərarın qanunsuz və ya əsassız olduğunu müəyyən etdikdə, onu ləğv edərək, müvafiq qərar (qərardad) qəbul edir və ya protokol tərtib edir, yaxud inzibati xəta haqqında məlumata yenidən baxılması üçün icraat materiallarını səlahiyyətli orqana (vəzifəli şəxsə) göndərir.

Bildirilib ki, nəzərdə tutulmuş yoxlama ilə əlaqədar müvafiq qərarı və ya qərardadı qəbul edən səlahiyyətli vəzifəli şəxsdən inzibati xəta haqqında materialları iş üzrə icraatın tələb edildikdə, materiallar bir gün ərzində hərbi prokurora təqdim edilməlidir.

Qanun layihəsi, həmçinin hərbi qulluqçuların xidməti vəzifələrinin xüsusiyyətini nəzərə alaraq, inzibati həbs tənbeh növü nəzərdə tutan inzibati xətalar haqqında işlərə dərhal və ya 48 saat müddətində deyil, 15 gün müddətində baxılmasını təklif edir.

Zabit, gizir, miçman, müddətdən artıq həqiqi hərbi xidmət hərbi qulluqçusunun (MAXE) məsuliyyəti artırılır.

Şəffaflıq.az xəbər verir ki, bununla bağlı İnzibati Xətalar Məcəlləsinə dəyişiklik təklif edilir.

Layihə Milli Məclisin Hüquq siyasəti və dövlət quruculuğu komitəsinin bugünkü iclasında müzakirəyə çıxarılıb.

Qeyd edilib ki, zabitin, gizirin, miçmanın, müddətdən artıq həqiqi hərbi xidmət hərbi qulluqçusunun hərbi hissədən və ya xidmət yerindən özbaşına getməsi, habelə üzrlü səbəblər olmadan hərbi hissəyə və ya xidmət yerinə vaxtında gəlməməsi bir gündən artıq, lakin on gündən çox olmayaraq törədildikdə 200 manatdan 300 manatadək məbləğdə cərimə ediləcəklər. Bununla bərabər, işin halları və pozuntu törədənin şəxsiyyəti nəzərə alınmaqla 15 günədək müddətə inzibati həbs tətbiq olunacaq.

Əvvəlki redaksiyada isə bu xəta üç gündən artıq, lakin on gündən çox olmayaraq törədildikdə 20 günədək müddətə inzibati həbs tətbiq olunurdu.

Daha bir təklif edilən dəyişikliyə görə yuxarıdakı maddədə nəzərdə tutulmuş əməllərin inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə 300 manatdan 500 manatadək məbləğdə cərimə ediləcək. Bu müddəada işin halları və pozuntu törədənin şəxsiyyəti nəzərə alınmaqla on gündən bir ayadək müddətə inzibati həbs tətbiq olunacaq.

Qüvvədə olan qanuna əsasən isə 15 gündən bir ayadək müddətə inzibati həbs tətbiq olunurdu.

Layihədə vurğulanıb ki, həmin şəxslərin bir gündən artıq hərbi hissədə və ya xidmət yerində olmaması onların inzibati məsuliyyətinə səbəb olacaq. Məsuliyyətin artırılması ilə yanaşı sanksiyanın yumşaldılması və alternativ cəza (cərimə) növünün müəyyənləşdirilməsi mütərəqqi addım hesab oluna bilər.