Dünya çempionatları tarixində təmsilçşiləri ən çox qələbə qazanan qitə konfederasiyaları müəyyənləşib.

Şəffaflıq.az FIFA-ya istinadən xəbər verir ki, qələbə sayına görə UEFA-nı təmsil edən komandalar ümumilikdə 808 matçda 468 qələbə qazanaraq ilk sırada yer alıblar.

Avropa təmsilçilərinin keçirdiyi görüşlərin 188-i heç-heçə, 152-si isə məğlubiyyətlə başa çatıb.

UEFA zonasında qələbə sayına görə Almaniya (68) liderdir. Növbəti sıralarda İtaliya (45), Fransa (39), İngiltərə (32), İspaniya (31), Niderland (30), Belçika (21), Rusiya (19), İsveç (19), Serbiya (18), Polşa (17), Portuqaliya (17), Macarıstan (15), İsveçrə (14), Xorvatiya (13), Çexiya (12), Avstriya (12), Danimarka (9), Rumıniya (8), Türkiyə (5), Şotlandiya (4), Bolqarıstan (3), Şimali İrlandiya (3), Şərqi Almaniya (2), Yunanıstan (2), Norveç (2), İrlandiya Respublikası (2), Ukrayna (2), Bosniya və Herseqovina (1), Slovakiya (1), Sloveniya (1) və Uels (1) qərarlaşıblar.

Cənubi Amerika Futbol Konfederasiyası (CONMEBOL) təmsilçiləri 358 oyunda 185 qələbə ilə ikinci sıradadır. Bu qitənin komandaları 73 heç-heçə edib və 100 dəfə məğlub olublar. CONMEBOL regionunda Braziliya 76 qələbə ilə liderdir. Argentina 47, Uruqvay 25, Çili 11, Kolumbiya 9, Paraqvay 7, Ekvador və Peru isə hərəyə 5 qələbəyə imza atıblar.

Afrika Futbol Konfederasiyasına (CAF) daxil olan komandalar ümumilikdə keçirdikləri 162 matçda 37 qələbə, 41 heç-heçə və 84 məğlubiyyətlə üçünçü pillədə yer alıblar. Regionda Nigeriya 6 qələbə ilə liderdir. Kamerun, Qana, Mərakeş və Seneqal hərəyə 5, Əlcəzair, Kot-d'İvuar və Tunis hərəyə 3, Cənubi Afrika Respublikası isə 2 qələbəyə malikdir.

Şimali, Mərkəzi Amerika və Karib hövzəsi Futbol Konfederasiyası (CONCACAF) komandaları 152 qarşılaşmada 34 qələbə qazanıblar, 33 heç-heçə ediblər və 85 məğlubiyyətlə üzləşiblər. Bu konfederasiyaya daxil olan millilərdən Meksika 17, ABŞ 9, Kosta-Rika 6, Kuba və Yamayka isə hərəyə 1 qələbə qazanıblar.

Asiya Futbol Konfederasiyası (AFC) təmsilçilərinin meydana çıxdığı 136 oyunda 25 qələbə, 26 heç-heçə və 85 məğlubiyyət qeydə alınıb. Bu göstəriciyə görə 5-ci yerdə olan Asiya qitəsində Yaponiya və Cənubi Koreya hərəyə 7, Səudiyyə Ərəbistanı 4, Avstraliya və İran hərəyə 3, Şimali Koreya isə 1 qələbə qazanıb.

Okeaniya Futbol Konfederasiyasının (OFC) komandaları isə mundialda meydana çıxdıqları 13 oyunda 1 qələbə, 5 heç-heçə və 7 məğlubiyyət göstəricisinə malikdir.

Avstraliya yığması 1974 və 2006-cı illərdə Almaniyada keçirilən dünya çempionatlarında OFC-ni təmsil edib və bu müddətdə cəmi 1 qələbə qazanıb. Komanda daha sonra AFC-nin tərkibinə keçib.

Qeyd edək ki, iyunun 11-dən iyulun 19-dək ABŞ, Kanada və Meksikada keçiriləcək DÇ-2026-ya ümumilikdə 48 komanda qatılacaq.

Türkmənistan qardaş Azərbaycanla əməkdaşlığın inkişafına sadiqdir.

Şəxəbər verir ki, bunu Türkmənistan Prezidenti Sərdar Berdiməhəmmədov bu ölkədə səfərdə olan Azərbaycanın mədəniyyət naziri Adil Kərimlini qəbul edərkən deyib.

S.Berdiməhəmmədov Azərbaycan Mədəniyyəti Günləri çərçivəsində keçiriləcək tədbirlərin iki ölkə arasında mədəni əlaqələrin inkişafına mühüm töhfə verəcəyinə əminliyini ifadə edib.

Adil Kərimli bildirib ki, Azərbaycan qardaş Türkmənistanla münasibətlərin inkişafına xüsusi önəm verir. O, qarşılıqlı mədəniyyət günlərinin iki ölkə arasında əlaqələrin möhkəmlənməsində mühüm rol oynadığını vurğulayaraq Türkmənistanda səfərdə olmaqdan məmnunluğunu ifadə edib.

Görüş zamanı qeyd olunub ki, Türkmənistanla Azərbaycan arasında əməkdaşlıq siyasi-diplomatik, ticarət-iqtisadi, mədəni-humanitar istiqamətlərdə dinamik inkişaf edir. Son illərdə dövlət və hökumət səviyyəsində keçirilən müntəzəm görüşlər və qarşılıqlı səfərlər nəticəsində tərəfdaşlıq münasibətləri keyfiyyətcə yeni mərhələyə yüksəlib.

İkitərəfli gündəlikdə mədəni-humanitar əməkdaşlığın xüsusi yer tutduğu vurğulanıb. Bu baxımdan mədəniyyətin müxtəlif sahələri üzrə təcrübə mübadiləsinə imkan yaradan birgə tədbirlərin əhəmiyyəti qeyd edilib.

S.Berdiməhəmmədov ötən ilin oktyabr ayında Azərbaycanda Türkmənistan Mədəniyyəti Günlərinin uğurla keçirildiyini xatırladıb və bu cür mədəni əlaqələrin xalqların daha da yaxınlaşmasına və dostluq münasibətlərinin möhkəmlənməsinə xidmət etdiyini söyləyib.

O, ortaq tarixi-mədəni irsin dövlətlərarası dialoqun daha da dərinləşməsi üçün möhkəm zəmin yaratdığına əminliyini ifadə edərək Türkmənistanın qardaş Azərbaycanla əməkdaşlığın inkişafına sadiq qaldığını da vurğulayıb.

Almaniya millisinin futbolçusu Lennart Karl dünya çempionatında oynamayacaq.

Şəffaflıq.az Almaniya Futbol İttifaqına istinadən xəbər verir ki, buna səbəb futbolçunun zədələnməsidir.

L.Karl Çikaqoda ABŞ seçməsi ilə yoldaşlıq oyunundan əvvəl keçirilən son məşqdə ciddi zədə alıb. Baş məşqçi Yulian Naqelsmann turnir üçün komandaya onun əvəzinə "Leypsiq"in yarımmüdafiəçisi Assan Uedraoqonu dəvət edib.

A.Uedraoqo ötən ilin noyabrında Slovakiya üzərində 6:0 hesablı qələbə qazandıqları dünya çempionatının seçmə mərhələ oyununda Almaniya yığmasının heyətində debüt edib və matçın son qolunu vurub.

Qeyd edək ki, Almaniya yığması DÇ-2026-da E qrupunda Kurasao, Fildişi Sahili və Ekvadorla mübarizə aparacaq.

Bu gün "Unikal" qəzeti və "Unikal.az" xəbər portalının fəaliyyətə başladığı gündür.

Şəffaflıq.az xəbər verir ki, media subyektlərinin fəaliyyətə başlamasından 16 il ötür.

Belə ki, ilk dəfə oxucularla görüşə 2010-cu il iyunun 6-da gələn "Unikal" qəzeti Medianın İnkişafı Agentliyi (MEDİA) tərəfindən maliyyələşir və layihə icra edir.

Unikal.az xəbər portalı uzun illərdir aktiv xəbər yayımını həyata keçirir və fəaliyyətə başladığı gündən oxucuların qarşısına ölkədə və dünyada baş verən dəqiq, operativ xəbərlərlə çıxır.

Hazırda qəzetin və saytın oxucuları müxtəlif sosial qrupları təmsil edən auditoriyadan ibarətdir. Sayt Azərbaycanda fəaliyyət göstərən ictimai-siyasi təşkilatlar, sosial qruplar, dövlət qurumları ilə əməkdaşlıq edir.

"Unikal"da çalışan əməkdaşları təbrik edir, onlara fəaliyyətlərində müvəffəqiyyətlər arzulayırıq!

Naxçıvan Muxtar Respublikası üzrə iyun ayının pensiya ödənişləri yekunlaşıb.

Şəffaflıq.az xəbər verir ki, bu barədə Naxçıvan Muxtar Respublikasının Əmək və Əhalinin Sosial Müdafiəsi Nazirliyi məlumat yayıb.

Belə ki, nazirliyin tabeliyindəki Dövlət Sosial Müdafiə Fondu tərəfindən iyun ayının pensiya ödənişi başa çatdırılıb.

Yaponiya şirkətləri neft-kimya sənayesində əsas komponent olan naftanın idxal həcmini ABŞ-İran münaqişəsindən əvvəlki səviyyənin 80%-nə qaytara biliblər.

Şəffaflıq.az xəbər verir ki, bu barədə "Nikkei Asia" qəzeti "Kpler" analitik şirkətinin məlumatlarına istinadən məlumat yayıb.

Məlumatlara görə, Yaponiya şirkətləri may ayında təxminən 1,05 milyon ton nafta idxal ediblər ki, bu da 2025-ci il üçün aylıq orta göstəricinin təxminən 78%-ni təşkil edir.

Nəşrin qeyd etdiyi kimi, ABŞ da daxil olmaqla alternativ təchizatçılar idxal həcmlərinin bərpasına kömək edib. Bundan əlavə, bəzi tankerlər Hörmüz boğazından keçərək Fars körfəzindən Asiyaya gedə biliblər.

Lakin qiymətlər ABŞ-İran münaqişəsindən əvvəlkindən 30% yüksək olaraq qalır. Yaponiya Neft-Kimya Sənayesi Assosiasiyasının sədri Kosiro Kudonun sözlərinə görə, yüksək qiymətlər bir müddət davam edəcək.

Nafta təchizatındakı problemlər səbəbindən Yaponiyadakı əsas kimyəvi maddələr istehsalçıları istehsalı azaltmaq məcburiyyətində qalıblar. Mart və aprel aylarında Yaponiyada etilen zavodlarının istifadə nisbəti rekord səviyyədə - 60-70%-ə düşüb.

Kuril adalarındakı Paramuşir adası yaxınlığında 5,0 bal gücündə zəlzələ qeydə alınıb.

Şəffaflıq.az-ın Rusiya mediasına istinadən verdiyi məlumata görə, yeraltı təkanlar 6 iyun tarixində yerli vaxtla saat 9:02-də qeydə alınıb.

Zəlzələnin episentri Severo-Kurilsk şəhərindən 76 kilometr cənub-şərqdə, ocağı isə 39 kilometr dərinlikdə yerləşib.

Yujno-Saxalinsk seysmik stansiyasının məlumatına görə, yeraltı təkanlar Severo-Kurilsk sakinləri tərəfindən hiss edilib. Zəlzələdən sonra sunami xəbərdarlığı edilməyib.

Şimali Koreya lideri Kim Çen In "Kan Kon" esminesini ziyarət edərək gəminin dəniz sınaqlarını yoxlayıb və ölkənin dəniz qüvvələrinin daha da gücləndirilməsinin vacibliyini vurğulayıb.

Şəffaflıq.az xəbər verir ki, bu barədə Şimali Koreyanın "Rodonq Sinmun" qəzeti məlumat yayıb.

Səfər zamanı Kim Çen In heyətin fəaliyyətini yüksək qiymətləndirib, gəminin kruiz və yüksək sürətli manevr imkanlarından məmnunluğunu bildirib.

Şimali Koreya lideri dəniz komandanlığına sınaqları tez bir zamanda başa çatdırmağı və "Kan Kon" esminesi ilə yanaşı, 5000-ci "Çve Hyen" hərbi gəmisini də istismara verməyi tapşırıb.

Kim Çen In həmçinin müharibənin qarşısını almaq və sülhü qorumaq üçün quruda, dənizdə və havada hərbi imkanları gücləndirməyin vacibliyini bildirib. O, donanmanın döyüş hazırlığının artırılmasının nüvə müharibəsinin qarşısının alınması strategiyasının vacib elementi olduğunu bildirib.

ABŞ qüvvələri İranın Goruk və Qeşm adalarındakı radar obyektlərinə zərbələr endirib.

Şəffaflıq.az xəbər verir ki, bu barədə ABŞ Mərkəzi Komandanlığı (CENTCON) məlumat yayıb.

"ABŞ ordusu İranın Goruk və Qeşm adalarındakı sahil radar qurğularına zərbələr endirib", - deyə məlumatda qeyd olunub.