Belarus müxalifəti itaətsizlik aksiyası keçirir
23-09-2020, 21:30
Belarusda müddətsiz itaətsizlik aksiyası keçiriləcək.
Şəffaflıq.az "Deutsche Welle"yə istinadən xəbər verir ki, bunu Belarus müxalifətinin yaratdığı Koordinasiya Şurası Rəyasət Heyətinin üzvü Pavel Latuşko bildirib.
Onun sözlərinə görə, seçkidə səslərin 80 faizindən çoxunu topladığını iddia edən Aleksandr Lukaşenko prezident kimi andiçmə mərasimində xüsusi əməliyyat keçirib.
Latuşko bildirib ki, Aleksandr Lukaşenko Belarus küçələrində xüsusi təyinatlı milis dəstələrini silahlandırır: “İndi o, bizdən, Belarus vətəndaşlarından ötrü heç kimdir. Biz seçkinin nəticəsi ilə heç vaxt razılaşmayacağıq və yeni seçkinin keçirilməsini tələb edirik”.
Prezidentliyə namizəd olmuş müxalifət lideri Svetlana Tixanovskaya Belarusun dövlət orqanlarının əməkdaşlarına müraciət edərək istefa verməyin vaxtının çatdığını vurğulayıb: “Legitim olmayan hakimiyyətlə bir yerdə işləmək cinayətdir. İstefa verəcəyiniz halda gələcəkdə iş stajınız saxlanılacaq, tutduğunuz vəzifəyə bərpa olunacaqsınız. Sosial müdafiəniz təmin olunacaq”.
Məlumata görə, işini itirən əməkdaşlar “Belarus Solidarity Foundation” təşkilatına müraciət edərək 1 500 avro məbləğində ödəniş ala bilər.
Qeyd edək ki, avqustun 9-da Belarusda keçirilən prezident seçkisinin qalibi Aleksandr Lukaşenko elan edilib. Həmin tarixdən Belarus müxalifəti və vətəndaşları yeni seçkinin keçirilməsi tələbilə etiraz aksiyası keçirir. Sentyabrın 23-də isə Lukaşenko 6-cı dəfə seçilən prezident kimi and içib.
Geri qayıt