Səfir: Azərbaycan Omanla nəqliyyat əməkdaşlığını dərinləşdirməyə hazırdır

Azərbaycan Omanla nəqliyyat sahəsində əməkdaşlığın daha da dərinləşdirilməsində maraqlıdır.

Şəffaflıq.az xəbər verir ki, bu barədə Azərbaycanın Omandakı səfiri Rəşad İsmayılovun "Times of Oman" nəşrində dərc olunmuş məqaləsində əks olunub.

Səfir bildirib ki, bu regional təchizat zəncirlərini şaxələndirməyə, daşımaların səmərəliliyini artırmağa və yeni investisiya imkanları açmağa imkan verəcək.

"Son illərdə Azərbaycan və Oman nəqliyyat, logistika, investisiya, bərpa olunan enerji, ticarət və rəqəmsal qarşılıqlı əlaqə sahələrində ikitərəfli əməkdaşlığın möhkəmləndirilməsinə ümumi sadiqlik nümayiş etdirirlər. İnkişaf edən siyasi dialoq və genişlənən iqtisadi tərəfdaşlıq, xüsusən də nəqliyyat əlaqələrinin inkişafı üzrə regional təşəbbüslər çərçivəsində yeni qarşılıqlı fəaliyyət istiqamətlərinin mənimsənilməsi üçün möhkəm əsas yaradır", - o yazıb.

İsmayılovun sözlərinə görə, Azərbaycan və Oman arasında nəqliyyat sahəsində əməkdaşlığın dərinləşməsi regional tədarük zəncirlərinin şaxələndirilməsi, daşımaların səmərəliliyinin artırılması, ticarətin dayanıqlığının gücləndirilməsi və yeni investisiya imkanlarının yaradılması üçün əhəmiyyətli potensiala malikdir. O qeyd edib ki, Omanın dəniz üstünlükləri ilə Azərbaycanın strateji quru nəqliyyatı infrastrukturunun birləşdirilməsi iki ölkəyə Asiya, Yaxın Şərq və Avropanı birləşdirən daha inteqrasiya olunmuş, dayanıqlı və səmərəli nəqliyyat şəbəkəsinin formalaşmasına töhfə verməyə imkan verəcək.

"Azərbaycan və Oman strateji tərəfdaşlığını möhkəmləndirməyə davam etdikcə, nəqliyyat və logistika sahələrində əməkdaşlıq ikitərəfli iqtisadi əlaqələrin əsas dayaqlarından birinə çevrilə bilər", - səfir vurğulayıb.

Rəşad İsmayılov əlavə edib ki, iki ölkənin coğrafi üstünlüklərindən, eləcə də bir-birini tamamlayan və inteqrasiya olunmuş infrastrukturdan istifadə sayəsində Azərbaycan və Oman Avrasiyanın daha çox qarşılıqlı əlaqəli, şaxələndirilmiş və dayanıqlı nəqliyyat şəbəkəsinin inkişafına mühüm töhfə verməyə qadirdir.