Azərbaycan və İsveçrənin iqtisadi sahədə əməkdaşlığı müzakirə olunub

Azərbaycan və İsveçrənin iqtisadi sahədə əməkdaşlığı barədə də müzakirələr aparılıb.

Şəffaflıq.az xəbər verir ki, bunu xarici işlər naziri Ceyhun Bayramov İsveçrə Konfederasiyasının federal xarici işlər naziri, ATƏT-in fəaliyyətdə olan sədri İqnasio Kassis ilə Bakıda mətbuat üçün brifinqdə deyib.

Nazir qeyd edib ki, bu kontekstdə iki ölkə arasında 25 sənəd mövcuddur, bir sıra sənədlər isə hazırda işlənilir, yaxın zamanlarda əlavə razılaşmaların şahidi olacağıq:

"Son 30 ildə İsveçrədən Azərbaycana 1.6 milyard, Azərbaycandan İsveçrəyə isə 2.3 milyard dollarlıq investisiya yatırılıb".

Nazir onu da qeyd edib ki, Azərbaycanda 110 İsveçrə şirkəti qeydiyyatdan keçib. Onlardan 87-si aktivdir. Bu şirkətlər sənaye, tikinti, kənd təsərrüfatı, nəqliyyat, ticarət və digər sahələrdə fəaliyyət göstərirlər.

C.Bayramov əlavə edib ki, bu ilin payız aylarında iki ölkə arasındakı iqtisadi komissiyanın növbəti iclası keçirilicək.