Məhkəmə Yekaterinburqda saxlanılan Şahin Lalayevin həbs müddətini uzadıb

Yekaterinburqun Lenin rayon məhkəməsi azərbaycanlı Şahin Lalayevin həbs müddətini 19 iyula qədər uzadıb.

Bu barədə Şəffaflıq.az xəbər verir.

Qeyd edək ki, Ş.Lalayev iyunun 26-da Yekaterinburqda Rusiya güc strukturlarının reydləri zamanı saxlanılıb. Onun barəsində məhkəmə iyunun 29-da 3 günlük həbs qətimkan tədbiri qəbul edib.

Xatırladaq ki, iyunun 27-də səhər Rusiya Federal Təhlükəsizlik Xidməti Yekaterinburqda azərbaycanlıların evlərinə basqın edib. Reyd zamanı iki nəfər öldürülüb, bir neçə nəfər isə xəsarət alıb. Öldürülən azərbaycanlılar tanınmış jurnalist Seyfəddin Hüseynlinin qardaşlarıdır. Onlar iyulun 1-də Ağcabədidə dəfn olunublar.

Azərbaycan Xarici İşlər Nazirliyi iyunun 28-də bəyanatla çıxış edərək, araşdırma aparılmasını və bu yolverilməz zorakılıq aktının günahkarlarının məsuliyyətə cəlb edilməsini tələb edib. Daha sonra XİN-ə Rusiyanın müvəqqəti işlər vəkili çağırılıb, ona baş verənlərlə bağlı kəskin etiraz bildirilib.