KİV: Rusiya ən bahalı təyyarələrini Ukraynanın hədəfindən uzaqlaşdırır

Ukrayna pilotsuz uçuş aparatlarının aerodromlarına hücumundan sonra Rusiya ən bahalı hərbi təyyarələrini bu ölkənin hədəfindən uzaqlaşdırıb.

Şəffaflıq.az ın "The Telegraph"a istinadən verdiyi xəbərə görə, iki "Tu-160" strateji bombardmançı və raket daşıyıcısı cəbhə xəttindən 6 min km-dən çox məsafədə yerləşən uzaq “Anadır” aviabazasına köçürülüb.

Nəşr qeyd edib ki, aerodrom Alyaskadan təqribən 660 km aralıda, yaşayış olmayan Çukotka yarımadasında yerləşir. Aerodrom “soyuq müharibə” dövründə - Rusiyanı ABŞ-nin potensial hücumlarından qorumaq üçün yaradılıb.

"Tu-160" səsdən sürətli bombardmançı təyyarələri nüvə silahı daşıya bilir və Rusiya arsenalında ən bahalısıdır, hər birinin qiyməti təxminən 500 milyon dollardır. Müqayisə üçün, Amerika bombardmançı donanmasının əsasını təşkil edən “B-52 Stratofortress” təxminən 94 milyon dollar dəyərində qiymətləndirilir", - müəlliflər vurğulayırlar.

Rusiyada ümumilikdə 16 belə təyyarənin istismarda olduğu bildirilir. Eyni zamanda, Ukrayna bildirib ki, həmin “Tu-160”ların bəziləri “Hörümçək toru” əməliyyatı çərçivəsində, iyunun 1-dəki hücum zamanı zədələnib.