ACF rəsmisi: Məşqçilərimizin hər birinə Kodokan institutunun prezidenti tərəfindən sertifikat verildi

Məşqçilərimizin hər birinə Kodokan institutunun prezidenti tərəfindən sertifikat verildi.

Bunu  açıqlamasında Azərbaycan Cüdo Federasiyasının (ACF) təhsil üzrə meneceri Orxan Oruczadə məşqçilərin Yaponiyanın paytaxtı Tokiodakı Kodokan institutunda peşəkar kurslarda iştirakı barədə danışarkən deyib.

Qurum rəsmisi Kodokan institutunun dünya cüdosunda əsas təhsil verən mərkəz hesab olunduğunu söyləyib:

“Cüdonun bütün dəyərlərinin aşılanmasında Kodokan institutunun əvəzedilməz rolu var. Ona görə də cüdo məşqçiləri, hakimləri, idmançılar üçün orada olmaq arzulanan bir səfərdir. Ora gedən məşqçilərimiz Azərbaycan Cüdo Federasiyasında təhsil verən, Beynəlxalq Cüdo Federasiyasının kursunu müvəffəqiyyətlə bitirən ən yaxşı müəllimlərdir. Onların peşəkarlıqlarının daha da artırılması üçün Kodokan institutu ilə əməkdaşlıq çərçivəsində kurslarda iştirakına dəstək olduq. Kurslarda cüdonun təməl prinsipləri sayılan “kata” anlayışının tam detallı öyrənilməsi, institutun müəllimləri tərəfindən izahı həyata keçirildi”.

Menecer Yaponiyaya gedən məşqçilərin uşaqlar üçün təşkil olunan məşqlərdə iştirak etdiklərini bildirib:

“100 kodokan texnikası” adlı fəndlər siyahısı mövcuddur. Fəndlərin uşaqlara və ya böyüklərə hansı formada tədris olunması ilə bağlı əhatəli izahlar verildi. Bundan əlavə, institutun müəllimlərinin uşaqlar və yeniyetmələr üçün gündəlik məşqlərini yaxından izləmək üçün şərait yaradıldı. Hətta məşqçilər Kodokan institutunun müəllimləri ilə yanaşı, uşaqlara müxtəlif fəndlərin göstərilməsində, birbaşa təmasın qurulmasında iştirak etdilər. Proses ümumilikdə 10 gün davam etdi. Məşqçilərimizin hər birinə Kodokan institutunun prezidenti tərəfindən sertifikat verildi”.

O.Oruczadə yaponların bizə qarşı xoş münasibət göstərdiklərini vurğulayıb:

“Gələcəkdə məşqçilərimizin kurslar keçməsi üçün institutla razılıq əldə etdik. Həmçinin oradan müəllimlərin Azərbaycana gətirilməsi və tədris prosesinə cəlb olunması ilə bağlı aramızda şifahi anlaşma əldə olundu. Dəfələrlə bizim idmançılarla yapon cüdoçular qarşılaşıblar. Bizə qarşı xoş münasibətləri var. Bu da əməkdaşlıq prosesinə müsbət təsir göstərir”.

Qeyd edək ki, Azərbaycanın 6 cüdo məşqçisi Yaponiyanın paytaxtı Tokiodakı Kodokan institutunda peşəkar məşqçilik kurslarında iştirak edib.

Şəffaflıq.az