Şamil Quliyev – 70 Şərəfli ömür yolu

  Şamil Oruc oğlu Quliyev bu il bir yaş daha qocalır. Qocalıq həm də ucalıqdır. Özünəməxsus gözəl xasiyyəti, ətrafındakılara olan isti münasibəti, insanlarla tez ünsiyyət qurması, yaşından asılı olmayaraq hamıya hörmətlə münasibət bəsləməsi Şamilin ağsaqqallığından xəbər verir. O, çox uzaqgörən ziyalıdır. Dostluqda sədaqət yaxşı əməl sayılır. Mehriban ailə başçısı, səmimi dost ömrünün müdriklik çağını yaşayan Hacı Şamil xalq arasında böyük hörmət və nüfuza malikdir. 

Onun xeyirxah əməlləri çoxdur. Belə xeyirxah insanlar haqqında yazmaq, onun həyat və fəaliyyətini gələcək nəsillərə çatdırmaq nümunəvi və savab işlərdən sayılır. Şamil Quliyev hələ orta məktəb illərində oxuyan zaman polis olmaq, asayişin keşiyində durmaq arzusunda olub. İllər keçdikdən sonra onun polis olmaq arzusu gerçəkləşdi. Ömür yolu enişli–yoxuşlu olsa da, asayişimizin keşiyində durduğu illərdə heç vaxt çətinliklərdən qorxmamışdır. Əlbəttə, insanın mühiti, irsiyyət faktoru, aldığı tərbiyə kredosu nə qədər önəmli olsa da, özünün şəxsi istəyi, əməyi olmadan heç bir kəs uca zirvələrə nail ola bilməz.Başqa insanlardan fərqlənən bir cəhəti də özünəməxsus gözəl xasiyyətidir. Sevdiklərimizlə bir araya gəlmək və gözəl bir atmosfer yaratmaq təkcə bugün yox hər gün üçün gözəldir. Şamilin keçdiyi həyat yoluna nəzər salanda həmin illər bir daha gözlərimizin önündə canlanır. Gəlin yubilyarın həyat yoluna nəzər salaq.

         Dövrünün tanınmış ağsaqqalarından olan Oruc kişinin ailəsində dünyaya göz açmışdır. Orta təhsilli olan Oruc kişi 56 illik ömrünün 40 ilini sürücülük peşəsində keçirmişdir. Halal və zəhmətkeş insan olmuşdur. Evinə haram tikə gətirməyib. Evdar qadın olan həyat yoldaşı Tahirə xanımla 6 oğul 1 qız böyüdüb boya başa çatdırmışlar. Oğlanlarından üçü daxili işlər orqanlarında xidmət keçib. Ailənin ilk oğlu İbrahim Quliyev Moskvada SSRİ Ali milis məktəbini bitirmiş 1978-1993-cü illərdə Gəncə, Quba, Yevlax, Yardımlı və Astara şəhərlərinin polis rəisi olmuşdur. Ehtiyatda olan polkovnik, I Qarabag müharibəsi veteranı, hüquq elmləri doktoru, professor, Respublikanın əməkdar müəllimidir. İkinci oğul Nizami Quliyev Dövlət Yol Polisində tağım komandiri vəzifəsinə qədər yüksəlmiş, 2008-ci ildə mayor rütbəsində təqaüdə çıxmışdır. 2017-ci ildə vəfat etmişdir. Şamil ailənin üçüncü övladıdır. 18 aprel 1954–cü ildə Lənkəran rayonunun Port–İliç (indiki Liman) şəhərində sadə zəhmətkeş ailədə dünyaya göz açmışdır. 1972–ci ildə Liman şəhər 1 saylı orta məktəbi bitirib. Elə həmin il Sumqayıt Politexnik Texnikumunun “Yol hərəkətinin təşkili” ixtisasına qəbul olmuşdur. 1972–1974–cü illərdə Bakı şəhərində orduda qulluq etmişdir. 1975–ci ildə Daxili İşlər Orqanlarında işə qəbul olur və Baş Dövlət Yol Polisi alayının Quba şəhərində yerləşən tağımına milis nəfəri kimi təyinat alır. Xidməti bacaracağı nəzərə alınaraq təyinatla Rusiyanın

İjevsk şəhərində xüsusi milis məktəbinə kursa göndərilir. 1979–cu ildə Astara daxili işlər şöbəsində bir il işlədikdən sonra 1980–cı ildən Lənkəran Daxili İşlər Şöbəsinin Dövlət Yol Polisi bölməsində xidmətə başlayır. Bir neçə il Baş Dövlət Yol Polisi İdarəsinin Yol Patrul Xidməti Alayının Göytəpə şəhərində yerləşən 11–ci tağımında dövlət avtomobil müfəttişi çalışır. 1983–cü ildə Çingiz İldırım adına Azərbaycan Politexnik İnstitutunun “Avtonəqliyyat” fakultəsinin qiyabi şöbəsinə qəbul olur. 1989–cu ildə təhsilini başa vurduqdan sonra polis leytenantı rütbəsi alır. Lənkəran ŞRPŞ–nın DYP bölməsində müfəttiş, rəis müavini, rəis əvəzi 1993–cü ildən DİN–nin Baş Dövlət Yol Polisi İdarəsinin Lənkəran şəhərində yerləşən 5 saylı rayonlararası qeydiyyat imtahan bölməsində axtarış üzrə rəis müavini təyin edilir və təqaüdə çıxana qədər bu vəzifədə çalışır. Şamil Quliyev torpaq qeyrəti çəkən, Vətən sevgisi ilə yaşayan polis işçisi, xalqın mərd və cəsur oğludur. O, torpaqlarımızı qorumaq üçün 1988–ci ildən başlayaraq dəfələrlə cəbhə bölgələrində ezamiyyətdə olub. Şuşa, Xankəndi, Laçın, Qubadlı rayonlarının müdafiəsində yaxından iştirak edib. Sonuncu dəfə polis yoldaşları ilə 7 gün köməksiz vəziyyətdə mühasirədə qalıblar. Düşmən qarşısında əyilməyən bu cəsurlar ağır döyüşə girərək düşmən mühasirəsini yarmışlar. Qala dərəsindən keçərkən onlara mərhum cəsur jurnalist Salatın Əsgərovanın şəhid olduğu yeri də göstərmişlər. Şamil I Qarabağ müharibəsi veteranıdır. Cəsur polis əməkdaşı haqqında DİN–nin mətbu orqanı olan “Mübariz keşikdə” qazetində göstərdiyi rəşadətə görə təşəkkür elan edilmişdir. 35 il daxili işlər orqanlarında qüsursuz xidmət etdikdən sonra 2010–cu ilin mayın 10–da kapitan rütbəsində ehtiyata buraxılmışdır. Asayişimizin keşiyində şərəflə və vicdanla xidmət etdiyi illərdə dəfələrlə Daxili İşlər Nazirinin, Baş Dövlət Yol Polisi İdarəsinin, Lənkəran Şəhər Rayon Polis Şöbəsinin və Lənkəran Şəhər İcra Hakimiyyəti Başçısı aparatının Fəxri Fərmanları ilə təltif edilmişdir. 1–ci, 2–ci, 3–cü və usta dərəcələrinə layiq görülmüşdür. Şamil Quliyev 2008–ci ildə Azərbaycan Polisinin yaranmasının 90 illiyi münasibətilə Daxili İşlər Naziri general–polkovnik Ramil Usubov tərəfindən DİN–nin 10 il qüsursuz xidmətə görə medalı, 65 illik yubileyində Lənkəran Ağsaqqallar Şurası və Respublika Veteranlar təşkilatı tərəfindən General Həzi Aslanov yubiley medalı ilə təltif edilmişdir. Şamil Quliyev 1996–cı ildə 42 yaşında olarkən Məşhəd, Kərbəla və Müqəddəs Həcc ziyarətlərində olub. Hacı Şamilin hərəkətində, davranışında, əməlində işıqlıq, doğma yurda, el–obaya bağlılıq var. Atası Oruc kişinin anası Tahirə xanımın adını nəcib və xeyirxah işləri ilə ucaldır. Əliaçıq, yetim qarnı doyuran Allah bəndəsi, zəngin və mənəvi dəyərlərə malik nəslin ləyaqətli övladıdır. Hazırda Hacı Şamil 3 övlad atası və 9 nəvə babasıdır. Həyat yoldaşı Təranə müəllimə Quliyeva Lənkəran şəhər 1 saylı tam orta məktəbdə müəllimə işləyir. Oğlu Cəmil Quliyev Azərbaycan Milli Elmlər Akademiyasının Lənkəran Regional Elmi Mərkəzində elmi katibdir. Tarix üzrə fəlsəfə doktorudur. Qızları Nuranə və Rəvanə evdar qadındır. 

Anadan olmasının 70 illik yubileyi münasibətilə I Qarabağ müharibəsi veteranı, ehtiyatda olan dövlət qulluqçusu, polis kapitanı Şamil Oruc oğlu Quliyevi ürəkdən təbrik edir, ona uzun ömür və möhkəm can sağlığı arzulayırıq. 

 Sübhan Talıblı: Tarix üzrə fəlsəfə doktoru, dosent

Şəffaflıq.az