Aparat rəhbəri: Mina xəritələrinin Azərbaycana təhvil verilməsi ilə bağlı davamlı çağırışlar edilib

Ermənistanın mina terrorunun işğaldan azad edilmiş müxtəlif rayonlarımızda çoxsaylı insan tələfatına səbəb olması, quruculuq işlərinin aparılmasına və keçmiş məcburi köçkünlərin öz doğma torpaqlarına qayıdışına maneə yaratması ilə bağlı mütəmadi olaraq Ombudsman tərəfindən reaksiyalar yayımlanıb və dəqiq mina xəritələrinin ölkəmizə təhvil verilməsi məqsədilə davamlı olaraq çağırışlar edilib.

Şəffaflıq.az-ın xəbərinə görə, bunu Ombudsman Aparatının rəhbəri Aydın Səfixanlı Milli Məclisin İnsan hüquqları komitəsinin bugünkü iclasında Azərbaycanın İnsan Hüquqları üzrə Müvəkkilinin (ombudsmanın) 2023-cü il üzrə məruzəsinin müzakirəsi zamanı deyib.

Onun sözlərinə görə, Ombudsman tərəfindən davamlı olaraq beynəlxalq təşkilatların diqqətinə çatdırılan növbəti önəmli məsələ Ermənistanın işğalından azad edilmiş ərazilərdə aşkarlanan kütləvi məzarlıqlarda azərbaycanlılara məxsus insan qalıqlarının qeyri-insani şəkildə basdırılması və onlara işgəncə verilərək qətlə yetirilməsi kimi hallarla, həmçinin Ermənistanın soyqırımı siyasətini təsdiqləyən faktlarla bağlı olub: "Ombudsman Ağdam rayonunun Ergi düzü ərazisində, Şuşa həbsxanası yaxınlığında, Qubadlı və Zəngilanda kütləvi məzarlıqların tapılması ilə bağlı beynəlxalq qurumlara ayrıca müraciətlər ünvanlayıb".