İlham Əliyev və Qaribaşvili iqtisadiyyat sahəsində əməkdaşlığı müzakirə ediblər

Cümə günü, noyabrın 24-də Bakıda Azərbaycan prezidenti ilə Gürcüstanın baş naziri arasında danışıqlar olub. 

Şəffaflıq.az xəbər verir ki, bu barədə Gürcüstan hökumətinin saytında bildirilir.

İlham Əliyev və İrakli Qaribaşvili arasında danışıqların əsas mövzusu ikitərəfli əməkdaşlıq olub.

“Görüşdə iki ölkə arasında çoxəsrlik, mehriban qonşuluq, dostluq münasibətlərinə əsas diqqət yetirilib və Azərbaycanın Gürcüstanın aparıcı ticarət tərəfdaşlarından biri olduğu bildirilib”.
Bundan əlavə, dörd sahədə - ticarət-iqtisadi, energetika, nəqliyyat və logistika sahələrində strateji qarşılıqlı fəaliyyət məsələlərinə toxunulub.

Azərbaycan dövlətinin başçısı və Gürcüstanın baş naziri Orta Dəhlizin inkişafı, Şərq-Qərb avtomobil yolunun tikintisi və Bakı-Tbilisi-Qars dəmir yolu layihəsini də müzakirə ediblər.

Gələcəkdə bu dəmir yolunun Avropa-Qafqaz-Asiya dəhlizinin bir hissəsinə çevriləcəyinə diqqət yönəldilib.