Bakıda “İdman zonası” istifadəyə verilib - FOTO

Gənclər və İdman Nazirliyi Xətai rayonunun Əhmədli qəsəbəsində “İdman zonası”nı istifadəyə verib.

“Report”un məlumatına görə, açılışda gənclər və idman naziri Fərid Qayıbov, nazir müavini Mariana Vasileva, idman səfirləri – voleybolçu Aynur İmanova, gimnast Aliyə Paşayeva, futbolçu Maksim Medvedev, həmçinin, İslam Həmrəyliyi Oyunlarının qalibi, basketbolçu Zaur Paşayev də iştirak ediblər.

Ərazidə minifutbol və basketbol meydançaları, stolüstü tennis, şahmat, uzunluğa tullanma zolağı, eləcə də hər yaş qrupuna uyğun fitnes avadanlıqları yerləşdirilib. Bundan əlavə, sakinlərin istirahət etmələri üçün oturacaqlar quraşdırılıb.

Fərid Qayıbov çıxışında əhalinin sıx məskunlaşdığı yerlərdə bu layihənin davam etdiriləcəyini söyləyib:

“Bu idman qurğusunda insanlar bir çox növlə məşğul ola bilərlər. Eyni zamanda, pulsuz internet də çəkilib. Nazirliyin qarşısında quraşdırdığımız idman qurğuları çox populyar oldu. Düşündük ki, belə qurğuların sayı artsın. Layihəni regionlara da yaymağın üzərində çalışacağıq. İl ərzində bu cür açılışları digər şəhər və rayonlarda da etməyi planlaşdırırıq”.

Nazir bildirib ki, qurğuların salınması prosesində federasiyalarla birgə çalışırlar:

“Regionlarda işlər gedir. Qurğuların federasiyalar tərəfindən inşası ilə bağlı təklif edə bilərik. Ancaq hər şey maliyyədən asılıdır. Məncə, onlar bu təşəbbüsə qoşularlar”.

Azərbaycan millisinin basketbolçusu Zaur Paşayev meydançaların açılmasını əhali üçün gözəl fürsət kimi dəyərləndirib:

“Uşaqlar həyətə düşəcək və boş vaxtlarında idmanla məşğul ola biləcəklər. İnanıram ki, hazırda bu baxımdan boş olan digər məhəllələrdə də “İdman zonası” açılacaq. Uşaqlar belə yerlərdə idmanın hansı növündə bacarıqlı olduqlarını görür və o istiqamətdə addımlayırlar”.

Bədii gimnastika üzrə Azərbaycan millisinin üzvü Aliyə Paşayeva da idman qurğularının istifadəyə verilməsinin sevindirici olduğunu deyib:

“Belə meydançalar çox olsa, idmanımız daha çox inkişaf edər. Əsas məqsəd əhalinin və uşaqların sağlamlığıdır”.

Şəffaflıq.az