Azərbaycan ağırlıqqaldırma tarixində yeni rekord qeydə alınıb

Şüvəlan qəsəbəsindəki Ağırlıqqaldırma Akademiyasının yarış zalında qadınlar, kişilər və veteranlar arasında ağırlıqqaldırma üzrə Azərbaycan Kubokuna start verilib.

Azərbaycan Ağırlıqqaldırma Federasiyasından verilən məlumata görə, dekabrın 21-23-də şəhər və rayonların, idman cəmiyyətlərinin, idman klublarının, idman mərkəzlərinin, UGİM-lərinin hazırkı əsasnamə üzrə təyin olunmuş dərəcə normalarını yerinə yetirən və tibbi müayinədən keçən yüzdən çox atlet bu yarışda öz qüvvələrini sınayacaqlar.

Artıq ilk rekord qeydə alınıb. Yarışa 25 nəfər qadın idmançı qatılıb ki, bu da Azərbaycan ağırlıqqaldırma tarixində bir ilkdir. Bu günə qədər respublika dərəcəli heç bir yarışda bu qədər qadın ağırlıqqaldıran iştirak etməyib. Onlar bu gün həm müxtəlif çəki dərəcələrində, həm də mütləq qalibi müəyyən edəcəklər.

Daha bir ilk hakimliklə bağlıdır. Respublika dərəcəli ağırlıqqaldırma turnirlərində ilk dəfə qadın mütəxəssis yarışın baş hakimi təyin edilib. Bu vəzifə sabiq ağırlıqqaldıran, qadınlar arasında Azərbaycan çempionu, ustadlar arasında üçqat Avropa və dünya çempionu Səbinə Rzayevaya həvalə edilib.

Şəffaflıq.az