Xocalı Soyqırımının 30-cu ildönümü ilə əlaqədar Şamaxı rayon Mədəniyyət evində tədbir keçirilib.-FOTO
24-02-2022, 18:36
Xocalı Soyqırımının 30-cu ildönümü ilə əlaqədar Şamaxı rayon Mədəniyyət evində tədbir keçirilib.Şəffaflıq.az xəbər verir ki, tədbirdə Şamaxı Rayon İcra Hakimiyyətinin başçısı Tahir Məmmədov, Milli Məclisin deputatı Tamam Cəfərova, hüquq mühafizə orqanlarının rəhbərləri, rayon ictimaiyyətinin nümayəndələri, Vətən Müharibəsi iştirakçılarının bir qismi iştirak etmişdir.
Milli Məclisin deputatı Tamam Cəfərova tarixi torpaqlarımızda məskunlaşmış ermənilərin ölkəmizə qarşı daim ərazi iddiasında olmaları, məkrli və təcavüzkar siyasət yürütmələri torpaqlarımızın iyirmi faizini işğal etmələri, əlverişli strateji və coğrafi mövqedə olan Xocalıda və digər yaşayış məntəqələrimizdə xüsusi amansızlıqla xeyli sayda dinc sakinləri qətlə yetirmələri və əsirlərə qarşı qeyri-insani hərəkətlər etmələrini qeyd edib.
Daha sonra tədbirdə çıxış edən YAP Şamaxı rayon təşkilatının sədri Tural Qasımlı, Qafqaz Müsəlmanları İdarəsinin Şamaxı və Qobustan üzrə səlahiyyətli nümayəndəsi Mərəhmət Mustafayev, Xocalı Polis İdarəsinin sabiq rəis müavini Hafiz Ədilov, Şamaxı rayon Ağsaqqallar Şurasının sədri Mayıl Alcanov, Şamaxı rayon Veteranlar Təşkilatının sədri Ağarza Bayramov, II Qarabağ müharibəsinin veteranıları Elvin Məmmədli, Rizvan Cəbrayılov Xocalı faciəsinin baş vermə səbəblərindən və onun acı nəticələrindən geniş söhbət açaraq, 44 günlük Vətən Müharibəsi nəticəsində bütün şəhidlərimiz kimi Xocalı şəhidlərinin də qisasının alındığını bildiriblər.
Tədbirdə çıxış edən Şamaxı Rayon İcra Hakimiyyətinin başçısı Tahir Məmmədov Xocalı
Soyqırımının insanlığa qarşı törədilmiş ən dəhşətli cinayət olduğunu qeyd edərək Xocalı həqiqətlərinin dünyaya çatdırılması bu soyqırımın beynəlxalq aləmə yayılması, qətliama obyektiv qiymət verilməsi istiqamətində Heydər Əliyev Fondunun gördüyü işləri xüsusi vurğulayıb. Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq kampaniyası nəticəsində dünya ictimaiyyətinin məlumatlandırılması məqsədilə həyata keçirilən tədbirlərdən bəhs edib.
Tədbir çərçivəsində, Azərbaycan Respublikasının Prezidenti, Ali Baş Komandan cənab İlham Əliyevin müvafiq Sərəncamlarına əsasən medallarla təltif olunan bir neçə Vətən müharibəsi iştirakçısına medallar təqdim olunub.
Şəffaflıq.az
Şamaxı şəhəri
Geri qayıt