"Neftçi" Çempionlar Liqasında mübarizəni dayandırıb - YENİLƏNİB - 2
28-07-2021, 23:06
"Neftçi" UEFA Çempionlar Liqasının II təsnifat mərhələsində cavab oyununda Yunanıstan "Olimpiakos"u ilə qarşılaşıb."Report"un məlumatına görə, "Bakcell Arena"da keçirilən flaqmanın 0:1 hesablı məğlubiyyəti ilə başa çatıb.
Hər iki komanda matça ciddi itkilərlə çıxıblar. Qonaqların heyətində 8 futbolçu oyunu buraxıb. "Ağ-qaralar"da isə Namik Ələskərov zədə, Mert Çelik cəza səbəbindən oynamayıb. Ələskərovun yoxluğunda baş məşqçi Samir Abasov hücumda yarımmüdafiəçi Sezar Meza Kolliyə şans verib.
"Neftçi" azarkeşlərin möhtəşəm dəstəyi ilə oyuna sürətli başlayıb. İlk dəqiqələrdən meydanın rəqibə aid hissəsində pressinq edən paytaxt təmsilçisi 3-cü dəqiqədə qola yaxın olsa da, Meza Kollinin uzaq məsafədən zərbəsini qapıçı Konstantinos Tsolakis çətinliklə dəf edib. 15-ci dəqiqədə isə Mamadu Mbocun kobud səhvindən sonra qonaqlar hesabı açıblar. Pirey təmsilçisinin heyətində Giorqos Masuras fərqlənib. Müdafiədəki çaşqınlıq buraxılan qoldan sonra da davam edib. Epizodların birində Ömər Buludov topu başla qapıçısı Aqil Məmmədova ötürmək istəyərkən az qala avqotol müəllifi olacaqdı. 30-cu dəqiqədə “Neftçi”nin heyətində məcburi əvəzetmə gerçəkləşib. Zədələnən Buludovun yerinə meydana Mirabdulla Abbasov daxil olub. Bundan sonra Harramiz Soareş müdafiənin sağ cinahına keçib. Abbasov meydana çıxdıqdan cəmi 6 dəqiqə sonra qol vurmaq üçün yaxşı fürsət yaxalasa da, müdafiəçilər hesabın bərabərləşməsinə imkan verməyiblər. Ardınca Sabir Buqrinin yerlə qüvvətli zərbəsində dəqiqlik çatmayıb. 44-cü dəqiqədə yerli azarkeşlər Vətən müharibəsi ilə bağlı “Şəhidlər ölməz, Vətən bölünməz” şüarları səsləndiriblər. İlk hissə qonaqların minimal hesablı üstünlüyü ilə başa çatıb.
İkinci yarıya hər iki komanda ehtiyatlı başlayıb. 55-ci dəqiqədə Meza Kollinin uzaq məsafədən vurduğu top qapıdan xeyli aralı keçib. Az sonra Aqil Məmmədov ardıcıl 2 künc zərbəsi zamanı komandasını real qoldan xilas edib. “Neftçi” 70-ci dəqiqədən sonra təzyiqi artırsa da, bu, hesabda öz əksini tapmayıb. Matçın sonlarına doğru sağ cinahdan ötürülən topa Laval istədiyi kimi toxuna bilməyib. Görüşün sonunca dəqiqəsində Fəhmin Muradbəylinin vurduğu top az fərqlə qapı dirəyinin yanından keçib.Beləliklə, ilk oyundakı kimi, cavab görüşündə də rəqibinə 0:1 hesabı ilə uduzan “Neftçi” Çempionlar Liqasında mübarizəni dayandırıb. “Ağ-qaralar” yoluna Avropa Liqasında davam edəcək. Paytaxt təmsilçisi III təsnifat mərhələsində Finlandiyanın HİK (Helsinki) klubu ilə qarşılaşacaq. Flaqman ilk oyunu avqustun 5-də evdə, cavab matçını isə bir həftə sonra səfərdə keçirəcək.
"Neftçi" və Yunanıstanın "Olimpiakos" komandaları arasında UEFA Çempionlar Liqasının II təsnifat mərhələsinin cavab oyununda ikinci hissə start götürüb.
"Report"un məlumatına görə, ilk yarıdan sonra "ağ-qaralar" rəqibinə uduzur - 0:1.
"Neftçi" və Yunanıstanın "Olimpiakos" komandaları arasında UEFA Çempionlar Liqasının II təsnifat mərhələsinin cavab oyununda ilk hissə başa çatıb.
"Report"un məlumatına görə, birinci yarıdan sonra hesab Pirey təmsilçisinin xeyrinədir - 1:0.
"Neftçi" və Yunanıstanın "Olimpiakos" komandaları arasında UEFA Çempionlar Liqasının II təsnifat mərhələsinin cavab oyununda ilk qol vurulub.
"Report"un məlumatına görə, Pirey təmsilçisi 15-ci dəqiqədə hesabı açıb. Qonaqların heyətində Giorqos Masuras fərqlənib.
"Neftçi" və Yunanıstanın "Olimpiakos" komandaları arasında UEFA Çempionlar Liqasının II təsnifat mərhələsinin cavab oyunu başlayıb.
"Report"un məlumatına görə, "Bakcell Arena"da keçirilən qarşılaşma saat 21:00-da start götürüb. Görüşü ispaniyalı FIFA referisi Rikardo de Burqos idarə edir.
Qeyd edək ki, Pirey şəhərindəki ilk matçda "Neftçi" rəqibinə 0:1 hesabı ilə uduzub.
Geri qayıt