Azərbaycanda məşğul və işsiz əhalinin sayı açıqlandı
20-01-2021, 17:55
2021-ci il yanvarın 1-i vəziyyətinə olan ilkin məlumatlara əsasən, ölkədə iqtisadi fəal əhalinin, yəni məşğul və işsiz əhalinin ümumi sayı 5 milyon 252,5 min nəfər olub.
Şəffaflıq.az-ın Dövlət Statistika Komitəsindən əldə etdiyi məlumata əsasən, ötən il iqtisadi fəal əhalinin sayı 2019-cu ilin eyni dövrü ilə müqayisədə 1,2 faiz artıb.
İqtisadi fəal əhalinin 4 milyon 876,6 min nəfərini məşğul əhali, yəni qanunvericiliyə zidd olmayan və qazanc gətirən hər hansı fəaliyyətlə məşğul olan Azərbaycan Respublikasının vətəndaşları və ya ölkədə daimi yaşayan vətəndaşlığı olmayan şəxslər, həmçinin əcnəbilər təşkil edib ki, onların sayı 2019-cu ilin müvafiq dövrü ilə müqayisədə 1,3 faiz azalıb.
Əlavə olaraq bildirilib ki, 2020-ci il dekabrın 1-i vəziyyətinə muzdla çalışan işçilərin sayı 1 milyon 684,5 min nəfər, o cümlədən iqtisadiyyatın dövlət sektorunda 917,8 min nəfər, qeyri-dövlət sektorunda isə 766,7 min nəfər təşkil edib.
İqtisadiyyatın neft-qaz sektorunda 33,9 min nəfər, qeyri neft-qaz sektorunda isə 1 milyon 650,6 min nəfər çalışıb.
2020-ci ilin yanvar-noyabr aylarında bir işçiyə düşən orta aylıq işlənmiş iş saatlarının miqdarı 139 saat təşkil edib.
Geri qayıt