İran Xarici İşlər Nazirliyi (XİN) ABŞ-nin İslam Respublikasının nüvə proqramı ilə bağlı Vaşinqtona məlumat ötürənlərə 20 milyon dollar təklifinə etiraz edib və mövzuya dair BMT ilə Atom Enerjisi üzrə Beynəlxalq Agentliyə (AEBA) məktub ünvanlayıb.

Şəffaflıq.az IRIB-yə istinadən xəbər verir ki, məktubu İranın XİN başçısı Abbas Əraqçi yazıb.

"Xarici işlər naziri Abbas Əraqçi ABŞ Dövlət Departamentinin İranın nüvə proqramı barədə məlumat verilməsi müqabilində 20 milyon dollara qədər mükafat təklif etməsi ilə bağlı bəyanatına sərt reaksiya verib", - məlumatda deyilir.

İranın baş diplomatının məktubunda ABŞ-nin bəyanatı "nifrət doğuran və təəssüfverici" adlandırılıb.

Xatırladaq ki, ABŞ Dövlət Departamenti informatorların və onların ailələrinin köçürülməsi imkanını da nəzərdə tutaraq, İranın nüvə proqramı haqqında məlumata görə 20 milyon dollara qədər mükafat elan edib.

Təklif "Ədalət naminə mükafat" (Rewards for Justice, RFJ) proqramı çərçivəsindədir.

İstanbulun Eyüpsultan rayonuna motosikletlə gələn naməlum şəxslər küçədə olan üç nəfərə odlu silahdan atəş açıblar.

Şəffaflıq.az "Haber Global"a istinadən xəbər verir ki, atəş nəticəsində yaralananlar xəstəxanaya çatdırılıb.

Polis motosikletlə hadisə yerindən qaçan şübhəlilərin tutulması istiqamətində əməliyyat-axtarış tədbirlərinə başlayıb.

Ermənistanın Baş naziri Nikol Paşinyan Türkiyəyə işgüzar səfər edib.

Şəffaflıq.az xəbər verir ki, bu barədə Ermənistan hökumətinin başçısı öz "Telegram" kanalında bildirib.

Paşinyan Antalyada BMT-nin İqlim Dəyişmələri üzrə Çərçivə Konvensiyasının Tərəflər Konfransının 31-ci sessiyası (COP31) çərçivəsində təşkil olunan Liderlər Sammitində iştirak edəcək.

Səfər zamanı Ermənistanın Baş nazirinin xarici tərəfdaşlarla ikitərəfli görüşləri də planlaşdırılır.

Qeyd edək ki, Paşinyan Fransaya işgüzar səfərindən sonra Türkiyəyə yola düşüb.

İran Prezidenti Məsud Pezeşkian Türkiyəyə yola düşüb.

Şəffaflıq.az xəbər verir ki, bu barədə "Tasnim" agentliyi məlumat yayıb.

Pezeşkian Antalyada BMT-nin İqlim Dəyişmələri üzrə Çərçivə Konvensiyasının Tərəflər Konfransının 31-ci sessiyası (COP31) çərçivəsində təşkil olunan Liderlər Sammitində iştirak edəcək.

Səfər çərçivəsində onun ikitərəfli görüşlər keçirəcəyi də gözlənilir.

Bu gün Antalya şəhərində Türkiyə Prezidenti Rəcəb Tayyib Ərdoğanın ev sahibliyi ilə COP31 Liderlər Zirvəsi keçiriləcək.

Şəffaflıq.az xəbər verir ki, zirvədə BMT-nin Baş katibi Antonio Quterreşin, eləcə də 95 ölkədən 102 liderin iştirakı gözlənilir.

Açılış mərasimində Prezident Rəcəb Tayyib Ərdoğan Türkiyənin iqlim strategiyası və baxışını təqdim edəcək. BMT-nin Baş katibi Antonio Quterreş və COP31-in sədri, ətraf mühit, şəhərsalma və iqlim dəyişikliyi naziri Murat Kurum da çıxış edəcəklər.

Proqram çərçivəsində Türkiyənin yeddi bölgəsinin xalq rəqslərini vahid xoreoqrafiyada birləşdirən "Anadolu Ateşi" rəqs qrupunun çıxışı təqdim olunacaq.

Bundan başqa, Türkiyənin COP31-in əsas mesajı kimi irəli sürdüyü "Tətbiq COP-u" konsepsiyasını əks etdirən xüsusi film nümayiş etdiriləcək. Zirvənin "Let's COP" adlı rəsmi mahnısı da dünya liderlərinin diqqətinə çatdırılacaq.

Türkiyədə müxtəlif ağır cinayətlərə görə axtarışda olan ölkə vətəndaşı Gürcüstanda saxlanılaraq deportasiya edilib.

Şəffaflıq.az xəbər verir ki, bu barədə ölkənin Daxili İşlər Nazirliyi (DİN) məlumat yayıb.

Məlumata görə, DİN-in Miqrasiya Departamentinin əməkdaşları xüsusi immiqrasiya nəzarəti tədbirləri çərçivəsində həmin şəxsin işləmək hüququ olmadan sahibkarlıq fəaliyyəti ilə məşğul olduğu yeri müəyyən edərək yoxlama aparıblar.

Nazirliyin bildirdiyinə görə, bu hal onun ölkədən çıxarılması üçün əsas olub.

Araşdırma zamanı müəyyən edilib ki, saxlanılan şəxs Türkiyənin hüquq-mühafizə orqanları tərəfindən qəsdən adam öldürmə, cinayətin gizlədilməsi, həbsdən yayınmaq məqsədilə qətl törətmə, rüşvət, təhdid və dələduzluq da daxil olmaqla müxtəlif cinayətlərə görə milli səviyyədə axtarışa verilib.

DİN əməkdaşları həmin şəxsi Sarpi sərhəd-keçid məntəqəsinə aparıblar. O, burada sonrakı hüquqi tədbirlərin görülməsi üçün Türkiyənin hüquq-mühafizə orqanlarının nümayəndələrinə təhvil verilib.

Türkiyənin sabiq ailə və sosial siyasət naziri Fatma Betül Sayan Kaya fondlarla bağlı aparılan istintaq çərçivəsində həbs edilib.

Şəffaflıq.az "TRT Haber"ə istinadən xəbər verir ki, Kaya prokurorluqda 2 saat 15 dəqiqə dindirildikdən sonra "Kapital bazarı haqqında" qanunun pozulması və cinayət törətmək məqsədilə yaradılan təşkilata üzv olmaqda şübhəli bilinərək məhkəməyə göndərilib.

Məhkəmə onun barəsində həbs qətimkan tədbiri seçib.

İş üzrə İlyas Kaya və Türkiyənin sabiq Kapital Bazarları Şurasının (SPK) sədri İbrahim Ömer Gönül barəsində isə məhkəmə nəzarəti tədbirləri tətbiq olunub. Məhkəmənin qərarına əsasən, onların hər ikisi mütəmadi olaraq imza atmalı və ölkədən çıxmamalıdır.

Xatırladaq ki, Kaya 26 sentyabr 2026-cı ilə qədər Ədalət və İnkişaf Partiyasında (AKP) sədr müavini olub. O, həmin tarixdə fond iddiaları ilə bağlı istintaqa kölgə salmaması üçün partiyadakı bütün vəzifələrindən azad olunmasını istəyib.

İstintaqın əsasını "Özata Denizcilik" şirkətinin OZATD səhmləri üzrə əməliyyatlar təşkil edir. Türkiyə mediasında yayılan mlumata görə, səhmlərin alınması və ötürülməsi barədə məlumatlar istintaq materiallarında göstərilib. Belə ki, Kaya 2026-cı ilin aprelində təxminən 250 min OZATD səhmi alıb. Onun əri İlyas isə təxminən 150 min səhm əldə edib. Səhmlər avqust və sentyabr aylarında satılıb. Cütlüyün əməliyyatları nəticəsində təxminən 2,17 milyard TL-lik (43,26 milyon ABŞ dolları) satış həyata keçirildiyi bildirilir.

Egey dənizində zəlzələ olub.

Şəffaflıq.az xəbər verir ki, bu barədə Türkiyənin Fəlakət və Fövqəladə Halların İdarə Olunması Agentliyi (AFAD) məlumat yayıb.

Məlumata görə, 3,9 maqnitudalı yeraltı təkanların episentri Türkiyənin Çanaqqala vilayətinin Ayvacık rayonundan 55 kilometr məsafədə olub. Zəlzələnin ocağı 9.29 km dərinlikdə yerləşib.

İstanbul Polis İdarəsinin Mütəşəkkil Cinayətkarlıqla Mübarizə Şöbəsi tərəfindən iş yerlərini hədəf alan hücumlar və cinayətkar qruplaşmaların fəaliyyəti ilə bağlı əməliyyat keçirilib.

Şəffaflıq.az xəbər verir ki, bu barədə İstanbul Polis İdarəsi məlumat yayıb.

Bildirilib ki, İstanbul mərkəzli olmaqla 3 vilayətdə eyni vaxtda keçirilən əməliyyatlar nəticəsində 12 şübhəli saxlanılıb.

Polis orqanları cinayətlərin və cinayətkarların cəzasız qalmaması üçün bu istiqamətdə mübarizənin və əməliyyatların qətiyyətlə davam etdiriləcəyini açıqlayıb.

Qazaxıstanda sentyabrın sonlarında Xəzər dənizində qazaxıstanlı hərbçilərin ölümü faktı üzrə cinayət işinin istintaqının gedişatında 300-dən çox şəxs dindirilib.

Şəffaflıq.az Qazaxıstan mediasına istinadən xəbər verir ki, bu barədə ölkənin Baş Prokurorluğunun məlumatında bildirilib.

"Baş vermiş faciənin bütün hallarının hərtərəfli və obyektiv şəkildə müəyyənləşdirilməsinə yönəlmiş istintaq hərəkətləri kompleksi həyata keçirilib. Bu günə qədər 300-dən çox şəxs dindirilib, 30-dan çox məhkəmə ekspertizası və tədqiqatı aparılıb", - məlumatda qeyd olunub.

Xatırladaq ki, faciə sentyabrın 24-də Xəzər dənizində təlim-döyüş tapşırığının icrası zamanı baş verib. Hava şəraitinin kəskin pisləşməsi nəticəsində hərbi qulluqçuları axın aparıb, 14 nəfər ölüb. Bununla əlaqədar Qazaxıstan Prezidenti Kasım-Jomart Tokayev ümummilli matəm elan edib, həmçinin ölkənin Müdafiə Nazirliyində kompleks yoxlama aparılması üçün komissiya yaradıb.