İraqın xarici işlər naziri Fuad Hüseyn İranın İraq Kürdüstan Regionunun Baş naziri Məsrur Bərzaninin ofisinə hücumla bağlı rəsmi izahat verməsini istəyib.

Şəffaflıq.az xəbər verir ki, bu barədə İraq Xarici İşlər Nazirliyinin Hüseynin İranın xarici işlər naziri Abbas Əraqçi ilə telefon danışığının yekunlarına dair açıqlamasında bildirilib.

Vurğulanıb ki, Hüseyn iranlı həmkarı ilə İraq Kürdüstan Regionunun Baş nazirinin ofisinə hücumu müzakirə edib. İraqın xarici işlər naziri bu hadisəni "gərginliyi artıra və regionda sabitliyi təhlükə altına ala biləcək təhlükəli presedent" adlandırıb.

İraqın baş diplomatı İrandan "bu hücumla bağlı rəsmi mövqeyini izah etməsini" istəyib.

Əraqçi isə bildirib ki, Tehran tərəfinin "hücumun İran ərazisindən həyata keçirildiyini göstərən hər hansı məlumatı yoxdur". İraq XİN-in açıqlamasına əsasən, Əraqçi bu insidentlə bağlı İran hökumətinin mövqeyini açıqlayan rəsmi bəyanat yayacağına söz verib.

Bundan əvvəl Məsrur Bərzaninin ofisi İranın pilotsuz uçuş aparatı tərəfindən hücuma məruz qaldığını bildirib. İraq Kürdüstanının Baş nazirinin sözlərinə görə, onun şəxsi ofisi və Təhlükəsizlik və Kəşfiyyat Agentliyinin rəhbərinin iqamətgahı İran dronlarının hücumuna məruz qalıb.

Bərzani hücumu təhlükəli eskalasiya və İraq Kürdüstanının təhlükəsizliyi və sabitliyinə birbaşa təhdid adlandırıb.

Türkiyə Prezidenti Rəcəb Tayyib Ərdoğan ilə ABŞ Prezidenti Donald Tramp arasında telefon danışığı olub.

Şəffaflıq.az "Haber Global"a istinadən xəbər verir ki, liderlər söhbət zamanı Türkiyə-ABŞ ikitərəfli münasibətləri ilə yanaşı, regional və qlobal prosesləri də müzakirə ediblər.

Prezident Ərdoğan İran və ABŞ arasında artan gərginlik fonunda diplomatiyanın əhəmiyyətinə diqqət çəkib və Türkiyənin sülh səylərini dəstəkləməyə davam edəcəyini bildirib.

Tehran və Vaşinqton arasındakı gərginliklə bağlı diplomatik imkanlardan maksimum istifadə edilməsinin vacibliyini vurğulayan Türkiyə Prezidenti Ankarının sülh səylərinə dəstəyini davam etdirəcəyini deyib.

Telefon danışığı zamanı Qəzzədəki son vəziyyət və sülh prosesi də müzakirə edilib. Rəcəb Tayyib Ərdoğan Qəzzədə sülh prosesinin ikinci mərhələsinə keçidin hədəfləndiyi bir vaxtda İsrail rəhbərliyinin fələstinliləri hədəf alan fəaliyyətlərinin artdığını vurğulayıb. O, Türkiyənin regionda davamlı sülhün təmin olunması üçün səylərini davam etdirəcəyini ifadə edib.

Türkiyə lideri, həmçinin Qəzzənin yenidən qurulması istiqamətində atılacaq addımlara dəstəyin davam etdiriləcəyini bildirib.

Ukrayna ordusunun Belqorod vilayətinin Koloskovo kəndinə endirdiyi zərbələr nəticəsində 6 dinc sakin həlak olub.

Şəffaflıq.az Rusiya mediasına istinadən xəbər verir ki, bu barədə Belqorod vilayətinin qubernatoru vəzifəsini müvəqqəti icra edən Aleksandr Şuvayev bildirib.

Bundan başqa, 4 nəfər, o cümlədən 1 uşaq xəsarət alıb. Xəsarət alanlardan ikisi xəstəxanaya yerləşdirilməkdən imtina edib, digərləri, o cümlədən 14 yaşlı yeniyetmə isə xəstəxanaya göndərilib.

Qubernator qeyd edib ki, zərbə nəticəsində, həmçinin bir tikili yanıb və minik avtomobili zədələnib.

Pakistanın Baş naziri Şahbaz Şərif Astanaya dövlət səfəri edəcək.

Şəffaflıq.az "Akorda"ya istinadən xəbər verir ki, bu barədə Qazaxıstan Prezidenti Kasım-Jomart Tokayevin Pakistanın Müstəqillik Günü münasibətilə ünvanladığı təbrik məktubunda deyilir.

K.Tokayev Pakistanın dayanıqlı inkişaf yolunda əldə etdiyi mühüm nailiyyətləri qeyd edib, ikitərəfli və beynəlxalq gündəliyin geniş spektrli məsələləri üzrə əməkdaşlığın daha da möhkəmləndirilməsinə sadiqliyini ifadə edib.

Qazaxıstan Prezidenti, həmçinin Şahbaz Şərifin Astanaya qarşıdan gələn dövlət səfərini səbirsizliklə gözlədiyini və bu səfərin iki ölkə arasında əməkdaşlığa yeni təkan verəcəyini vurğulayıb.

K.Tokayev Pakistan Prezidenti Asif Əli Zərdariyə və Şahbaz Şərifə fəaliyyətlərində uğurlar, Pakistan xalqına isə firavanlıq və tərəqqi arzulayıb.

İki mütəşəkkil cinayətkar dəstə başçısı Gürcüstandan Türkiyəyə ekstradisiya edilib.

Şəffaflıq.az "TRT Haber"ə istinadən xəbər verir ki, bu barədə Türkiyənin Daxili İşlər Nazirliyi məlumat yayıb.

Qeyd edilib ki, "Redkitler" və "Erdoğan Aykut" adlı cinayətkar dəstələrin liderləri Fərhad Delen və Ərdoğan Aykut Gürcüstanda tutularaq Türkiyəyə gətirilib.

Ermənistanda hərbi hissələrdən birində hərbçi Edqar Zakaryanın meyiti tapılıb.

Şəffaflıq.az Ermənistan mediasına istinadən xəbər verir ki, bu barədə ölkənin Müdafiə Nazirliyindən bildirilib.

Güllə yarası almış hərbçinin meyiti bu gün aşkarlanıb. Hadisənin başvermə şəraitini aydınlaşdırmaq üçün araşdırma aparılır.

Türkiyənin Yalova əyalətində təlim zamanı F16 təyyarəsi qəzaya uğrayıb.

Şəffaflıq.az xəbər verir ki, bu barədə NTV məlumat verib.

Qeyd olunub ki, pilot qəza zamanı katapult edib.

Hazırda əraziyə yanğınsöndürmə və tibbi briqadalar cəlb olunub.

Qəzanın səbəbləri araşdırmadan sonra məlum olacaq.

Qazaxıstan Xəzər dənizinin monitorinqi və ixtisaslaşdırılmış laboratoriyaların təchizatı üçün avadanlıqların alınmasına təxminən 2,36 milyon dollar yönəldib.

Şəffaflıq.az-ın verdiyi məlumata görə, bu barədə ölkə hökumətindən bildirilib.

Bu vəsait Qazaxıstanın Xəzər dənizi üzrə Elmi-Tədqiqat İnstitutuna dövlət ehtiyatından ayrılıb. Avadanlıqlardan bilavasitə akvatoriyada tədqiqatların aparılması, eləcə də hidrobioloji və hidrokimyəvi laboratoriyaların fəaliyyəti üçün istifadə olunacaq.

Tədqiqat proqramı 21 stansiyanı əhatə edən iki dəniz ekspedisiyasını və 22 sahilyanı nöqtədə müntəzəm monitorinqi nəzərdə tutur.

Eyni zamanda, Qazaxıstan digər Xəzəryanı dövlətlərlə birlikdə Xəzərdəki dəyişikliklərə uyğunlaşma və onun ekosisteminin qorunması üzrə Fəaliyyət Planını müzakirə edir. Sənəd region ölkələri arasında birgə tədbirləri, elmi məlumat mübadiləsini və tədqiqatların əlaqələndirilməsini özündə ehtiva etməlidir.

Gürcüstan mediası İlham Əliyevin Avropaya elektrik enerjisi ixracı və enerji dəhlizləri ilə bağlı açıqlamalarını geniş işıqlandırıb.

Şəffaflıq.az xəbər verir ki, Gürcüstanın aparıcı televiziya kanalları və xəbər resursları Azərbaycan Prezidenti İlham Əliyevin ötən gün Naxçıvanda verdiyi müsahibəyə geniş yer ayırıb.

Gürcüstanın İctimai Televiziyasının (1TV) və "İmedi" telekanalının internet səhifələrində yayımlanan materiallarda Azərbaycan Prezidentinin Azərbaycanın Avropa bazarına elektrik enerjisi ixrac etmək niyyəti, bu istiqamətdə Gürcüstan və Türkiyənin əsas tranzit marşrut kimi rolu, eləcə də regionda yeni enerji və nəqliyyat bağlantılarının yaradılması ilə bağlı fikirləri ön plana çıxarılıb.

Nəşrlər İlham Əliyevdən sitatlar gətirib, onun fikirlərini şərh ediblər. "Azərbaycan artıq Avropa bazarına neft və qaz ixrac edir və elektrik enerjisinin də Avropa bazarına çatdırılması istiqamətində imkanları genişləndirmək niyyətindədir", - nəşrlər Prezidentin bu sözlərini dərc ediblər. Prezidentin sözlərinə görə, hazırda Azərbaycanın Avropa bazarına elektrik enerjisi ixrac etməsi üçün əsas marşrut Gürcüstan və Türkiyədən keçir.

"Regionumuzda Azərbaycan qədər enerji ilə hərtərəfli təchiz olunmuş başqa bir ölkə yoxdur, istər neft, istər qaz, istərsə də elektrik enerjisi olsun. İxrac imkanlarımızı qonşu ölkələrə genişləndirməklə Avropa bazarına da çıxış əldə edəcəyik. Biz artıq Avropanı neft və qazla təchiz etmişik, eyni zamanda Avropa bazarını elektrik enerjisi ilə də təmin etmək istəyirik", - deyə İlham Əliyevin fikirlərini nəşrlər tirajlayıblar.

Qeyd edilib ki, Azərbaycan Prezidenti bu imkanların genişləndirilməsinin vacibliyini vurğulayaraq, xüsusilə Qara dəniz enerji kabeli layihəsinə diqqət çəkib. O bildirib ki, layihənin texniki-iqtisadi əsaslandırması artıq hazırdır və ikinci elektrik ötürücü xəttinin yaradılması Azərbaycanın imkanlarını daha da gücləndirə bilər.

İlham Əliyev Azərbaycanın enerji sisteminin hazırda Rusiya, İran və Gürcüstanın enerji sistemləri ilə əlaqəli olduğunu, Gürcüstan üzərindən isə Türkiyəyə və daha sonra Avropa bazarına çıxışın təmin edildiyini qeyd edib.

Azərbaycan Prezidenti Ermənistan üzərindən Naxçıvana elektrik xətlərinin çəkilməsini nəzərdə tutan layihənin də hazır olduğunu bildirib. İlham Əliyev Azərbaycanın son illərdə elektrik enerjisi infrastrukturunun inkişafı istiqamətində gördüyü işlərdən də danışıb.

"Son beş ildir ki, biz Kəlbəcər dağlarında, hətta qarlı havada belə, 3500 metr hündürlükdə elektrik ötürücü qüllələr ucaldırıq", - deyə Prezident bildirib.

Onun sözlərinə görə, Ermənistan üzərindən Naxçıvana elektrik xəttinin çəkilməsi layihəsinə başlanılacağı təqdirdə, bu işlərin həyata keçirilməsi uzun müddət tələb etməyə bilər.

İlham Əliyev bu layihənin gələcəkdə Zəngəzur dəhlizi və TRIPP layihəsinin ayrılmaz hissəsinə çevrilə biləcəyini də qeyd edib.

Prezidentin sözlərinə görə, həmin marşrut yalnız dəmir yolu və avtomobil yolundan ibarət olmayacaq. Buradan fiber-optik kabellərin, elektrik xətlərinin və gələcəkdə zərurət yaranarsa, neft və qaz kəmərlərinin də keçirilməsi mümkün ola bilər.

Azərbaycan Prezidenti müsahibəsində Zəngəzur dəhlizinin iqtisadi əhəmiyyətinə də toxunub. O bildirib ki, dəhliz vasitəsilə 15 milyon ton və ya daha çox yükün daşınması əlavə iqtisadi fəaliyyətin yaranmasına, yeni iş yerlərinin açılmasına və Naxçıvanın mühüm nəqliyyat mərkəzlərindən birinə çevrilməsinə imkan verəcək.

İlham Əliyev qeyd edib ki, Zəngəzur dəhlizi ideyası ilk dəfə irəli sürülərkən əsas diqqət nəqliyyat seqmentinə yönəlsə də, hazırda layihəyə daha geniş kontekstdə baxılır.

Gürcüstan mediasının Azərbaycan Prezidentinin açıqlamalarına geniş yer verməsi xüsusilə enerji, nəqliyyat və tranzit imkanları baxımından Bakı-Tbilisi əməkdaşlığının aktuallığını da ön plana çıxarıb.

Qeyd edək ki, Gürcüstan Azərbaycan enerji resurslarının Türkiyə və Avropa bazarlarına çıxarılmasında əsas tranzit ölkələrdən biridir. Azərbaycan və Gürcüstan arasında enerji və nəqliyyat sahəsində həyata keçirilən layihələr Cənubi Qafqazın regional bağlantısının və Avropanın enerji təhlükəsizliyinin gücləndirilməsi baxımından mühüm əhəmiyyət daşıyır.

Rusiyanın Samara vilayətində yüngül mühərrikli nəqliyyat təyyarəsi qəzaya uğrayıb, bir nəfər xəsarət alıb.

Şəffaflıq.az-ın Rusiya Fövqəladə Hallar Nazirliyinin region üzrə Baş İdarəsinə istinadən məlumatına görə, hadisə avqustun 12-si səhər saatlarında Koşkinsk rayonunun Novaya Jizn yaşayış məntəqəsi yaxınlığında baş verib.

Qəzada xəsarət alan şəxs xəstəxanaya yerləşdirilib. Başqa xəsarət alan və ya ölən olmayıb.

Qəzanın səbəbi və başvermə şəraiti araşdırılır.