Mədəniyyət Nazirliyinin regionlardakı dövlət teatrlarında direktor və direktor müavini vəzifələri üçün elan etdiyi müsabiqəyə, ilkin məlumata görə, 191 müraciət daxil olub.

Bu barədə Mədəniyyət Nazirliyindən məlumat verilib.

Bildirilib ki, ilkin dəyərləndirmələr nəticəsində 184 müraciət müsabiqədə iştirak üçün qəbul edilib.

Üzərində düzəliş edilməsi üçün 4 müraciət geri qaytarılıb, 3 müraciətdən isə imtina olunub.

Xatırladaq ki, müsabiqəyə müraciət avqustun 31-də başa çatıb. Hazırda digər müraciətlər üzrə dəyərləndirmələr davam etdirilir.

Şəffaflıq.az

Mədəniyyət naziri Adil Kərimli Naxçıvanda vətəndaşları qəbul edəcək.

Mədəniyyət Nazirliyindən verilən xəbərə görə, sentyabrın 24-də keçiriləcək qəbulda Naxçıvan şəhəri, Babək, Culfa, Kəngərli, Ordubad, Sədərək, Şahbuz, Şərur rayonlarından olan vətəndaşlar iştirak edə bilərlər.

Qəbul Naxçıvan Muxtar Respublikasının Mədəniyyət Nazirliyində keçiriləcək.

Şəffaflıq.az

Bakıda Bilgəh incəsənət məktəbinin açılışı olub.

Şəffaflıq.az xəbər verir ki, Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyeva və qızı Arzu Əliyeva açılışda iştirak ediblər.

Mədəniyyət naziri Adil Kərimli incəsənət məktəbində görülən işlər barədə məlumat verib.

Bildirilib ki, Bilgəh incəsənət məktəbi Bilgəh qəsəbə Mədəniyyət Evi, 27 nömrəli uşaq musiqi məktəbi və Sabunçu rayon mərkəzləşdirilmiş kitabxana sisteminin 10 nömrəli kitabxana filialının fəaliyyətlərinin optimallaşdırılması nəticəsində yaradılıb.

Qeyd edək ki, Bilgəh qəsəbə Mədəniyyət Evinin inzibati binası 1987-ci ildə inşa olunduğundan ötən müddət ərzində köhnələrək istifadəyə yararsız vəziyyətə düşmüşdü. Bu səbəbdən Heydər Əliyev Fondu tərəfindən 220 yerlik yeni məktəb binası inşa olunub.

Zəruri mebel və avadanlıqlarla, əyani vəsaitlərlə təchiz edilən təhsil müəssisəsinin binasında musiqi, nəzəriyyə, xor, fotoqrafiya, rəssamlıq, heykəltaraşlıq, dizayn otaqları, xoreoqrafiya və akt zalları, qarderob, kitabxana və yeməkxana var.

Məktəbin həyətyanı ərazisində abadlıq və yaşıllaşdırma işləri də görülüb.

Laçın şəhərində "İkinci həyat" sərgisi təşkil edilib.

Şəffaflıq.az xəbər verir ki, sərgi 26 avqust - Laçın Şəhəri Günü çərçivəsində Mədəniyyət Nazirliyi və Azərbaycan Prezidentinin Laçındakı xüsusi nümayəndəliyinin təşkilatçılığı ilə "Arts Council Azerbaijan" incəsənət platforması tərəfindən təşkil olunub.

Sərginin əsas konsepsiyası köhnə, zədələnmiş və istifadəyə yarasız xalçaların, xüsusilə də Qarabağ xalçalarının rəngkarlıq vasitəsilə yeni sənət əsərlərinə çevrilməsi təşəbbüsündən ibarətdir.

Qeyd edilib ki, peşəkar rəssamlar tərəfindən xalçalar üzərində yaradılan bu əsərlər toxuculuq sənətini müasir bədii baxışla özündə birləşdirir. Yaradılan sənət nümunələri Qarabağ, folklor, musiqi, analıq, eləcə də miqrasiya kimi mövzuları əhatə edir.

Layihənin əsas hədəfləri mədəni irsin canlandırılması, Azərbaycan təsviri sənətinin təbliği və ictimaiyyətdə ekoloji məlumatlılığın artırılmasıdır.

Sərgi xalçaların təkrar istifadəsinin təşviqi ilə yanaşı, BMT-nin Dayanıqlı İnkişaf Məqsədlərinin müvafiq istiqamətlərini ("Dayanıqlı şəhərlər və icmalar", "Məsuliyyətli istehlak və istehsal", "İqlim üzrə fəaliyyət") də ehtiva edir.

Nümayiş olunan əsərlər ziyarətçilər tərəfindən maraqla qarşılanıb.

Mədəniyyət Nazirliyinin Aparatına yeni rəhbər təyinatı olub.

Şəffaflıq.az-ın məlumatına görə, mədəniyyət naziri Adil Kərimlinin müvafiq əmri ilə Hikmət Mövlud oğlu Mustafayev bu vəzifəyə təyin edilib.

Qeyd edilib ki, Hikmət Mustafayev 1971-ci ildə anadan olub. 1993-cü ildə Azərbaycan İnşaat Mühəndisləri Universitetini (indiki Azərbaycan Memarlıq və İnşaat Universiteti) fərqlənmə diplomu ilə, 2006-cı ildə isə Azərbaycan Dövlət İqtisad Universitetini "Beynəlxalq iqtisadi münasibətlər" ixtisası üzrə bitirib. 1994–1995-ci illərdə Azərbaycan Ordusunda həqiqi hərbi xidmət keçib. 1997-ci ildən dövlət qulluğunda fəaliyyət göstərən H.Mustafayev Dövlət Əmlak Komitəsində, İqtisadi İnkişaf Nazirliyində və Əmlak Məsələləri Dövlət Komitəsində müxtəlif məsul və rəhbər vəzifələrdə çalışıb.

O, eyni zamanda COP29 Azərbaycan Əməliyyat Şirkətində Aparat rəhbəri kimi bu mötəbər beynəlxalq tədbirin təşkilati və inzibati idarəetmə proseslərində fəal iştirak edib. Bu təyinatadək Heydər Əliyev Mərkəzi direktorunun müşaviri vəzifəsində fəaliyyət göstərən H.Mustafayev strateji planlaşdırma, institusional koordinasiya və təşkilati idarəetmə sahələrində geniş təcrübəyə malik mütəxəssis kimi tanınır.

Dövlət qulluğunda uzunmüddətli səmərəli fəaliyyətinə görə Azərbaycan Respublikası Prezidentinin 22 iyun 2019-cu il tarixli Sərəncamı ilə "Tərəqqi" medalı ilə təltif edilib.

Mədəniyyət Nazirliyinin və Azərbaycanın Rumıniyadakı səfirliyinin dəstəyi ilə Azərbaycan muğam mədəniyyəti Rumıniyanın Maramureş vilayətinin Tsırqu-Lapuş şəhərində keçirilən festivalda təqdim edilib.

Bu barədə Azərbaycanın Rumıniyadakı səfirliyindən məlumat verilib.

Maramureş vilayəti Gününə həsr olunan Rumıniya, Moldova, Ukrayna, Albaniya, Azərbaycandan vokal və rəqs ansambllarının iştirak etdiyi festivalda Azərbaycanı təmsil edən sənətçilər milli musiqi və muğam nümunələrini təqdim ediblər.

Tədbiri Rumıniyanın və iştirakçı ölkələrin dövlət rəsmiləri ziyarət ediblər.

Festivalda iştirak edən Azərbaycan Dövlət Akademik Filarmoniyasının, F.Əmirov adına Azərbaycan Dövlət Mahnı və Rəqs ansamblının solistləri - Televiziya Muğam müsabiqəsinin laureatı, xanəndə Rəvanə Qurbanova, kamançaçı, Əməkdar artist Xəyyam Məmmədov və tarzən, ansamblın meneceri, Əməkdar mədəniyyət işçisi Elçin Abbasov tədbirin təşkilatçıları tərəfindən təltif olunublar.

Tədbirdə Azərbaycanın Rumıniyadakı səfiri Qüdsi Osmanov və Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi Elçin Yusubovun rəhbərlik etdiyi nümayəndə heyəti iştirak edib.

Şəffaflıq.az

Naxçıvanda mədəni irsin qorunması və mədəniyyət müəssisələrinin inkişafı istiqamətində yeni layihələr həyata keçiriləcək.

Şəffaflıq.az xəbər verir ki, Naxçıvan Muxtar Respublikası Mədəniyyət Nazirliyi tərəfindən tarixi-mədəni irsin qorunması, abidələrin mühafizəsinin gücləndirilməsi və mədəniyyət müəssisələrinin maddi-texniki bazasının yenilənməsi istiqamətində yeni tədbirlərin həyata keçirilməsi nəzərdə tutulur.

Planlaşdırılan tədbirlər çərçivəsində tarixi-mədəni abidələrin daha geniş şəkildə tanıdılması və onlar barədə məlumatların ictimaiyyətə çatdırılması məqsədilə abidələrin ərazilərində məlumat lövhələrinin quraşdırılması həyata keçiriləcək.

Bununla yanaşı, Babək, Culfa və Ordubad rayonlarında fəaliyyət göstərən mədəniyyət saraylarında əsaslı təmir işləri aparılacaq.

Hazırda layihələrin icrası ilə bağlı hazırlıq işləri davam etdirilir. Bu məqsədlə layihə-smeta sənədlərinin hazırlanması üçün Nazirlik tərəfindən müvafiq şirkətlərlə müqavilələr bağlanılıb.

Digər mühüm istiqamət isə tarixi-mədəni irs nümunələrinin mühafizəsinin gücləndirilməsidir. Bu məqsədlə abidələrin mühafizə zonalarının müəyyənləşdirilməsi nəzərdə tutulur.

"Tanrının Zirehi: Ultimatum" filminin rəsmi səhifəsində filmin Bakıdakı çəkilişlərindən videokadrlar yayımlanıb.

Şəffaflıq.az xəbər verir ki, video kinofranşizanın Salem Jackiechan tərəfindən idarə olunan rəsmi instaqram səhifəsində yayımlanıb.

Videoda əvvəlcə təyyarə və çəkiliş qrupunun Azərbaycanın paytaxtına gəlişi göstərilir. Sonra hadisələr birbaşa çəkiliş meydançasında cərəyan edir: Ceki Çan beynəlxalq komandanın üzvləri ilə birlikdə çəkilişlərin yeni mərhələsinin başlamasına həsr olunmuş ənənəvi mərasimdə iştirak edir. Aktyor əlində film lövhəsini tutur, rejissor və layihənin digər iştirakçıları ilə ünsiyyət qurur, bundan sonra çəkiliş qrupu ümumi foto üçün obyektiv qarşısına keçir. Videoçarxda çəkilişlərə hazırlıq anları və çəkiliş texnikası da göstərilir.

Bakı mərhələsinin başlanması çəkilişlərin uğurlu startının rəmzi olan kino boşqabının sındırıldığı ənənəvi mərasimlə müşayiət olunub.

"Ultimatum" artıq kulta çevrilmiş "Tanrının Zirehi" franşizasının dördüncü filmidir. Baş rolu məşhur aktyor Ceki Çan ifa edir. Aktyor yenidən əfsanəvi macərapərəst "Asiya şahini" obrazını canlandırır. Bakı filmin bədii konsepsiyasına uyğun olaraq çəkiliş məkanı seçilib. Süjetə görə, hekayənin yeni bölümü Xəzər dənizinin ətrafında cərəyan edir. Buna görə də çəkilişlərin bu mərhələsi Azərbaycanda keçirilir.

Filmin bir sıra əsas səhnələri Bakıdakı müxtəlif məkanlarda lentə alınır.

"Tanrının Zirehi: Ultimatum" filminin çəkilişləri 2026-cı ilin payızınadək davam edəcək. Filmin premyerasının 2027-ci ildə keçirilməsi planlaşdırılır.

Mədəniyyət naziri Adil Kərimli Laçında vətəndaşları qəbul edəcək.

Mədəniyyət Nazirliyindən Şəffaflıq.az-a verilən xəbərə görə, qəbul 27 avqust saat 10:00-da Laçın rayonundakı Prezidentinin xüsusi nümayəndəliyinin inzibati binasında keçiriləcək.

Qəbulda Laçın, Kəlbəcər rayonlarından olan vətəndaşlar iştirak edə bilər.

Mədəniyyət Nazirliyi region teatrlarında direktor vəzifəsi üçün müsabiqə elan edib.

Bu barədə Mədəniyyət Nazirliyindən məlumat verilib.

Qeyd olunub ki, müsabiqə regionlarda fəaliyyət göstərən dövlət teatrlarında vakant olan direktor və direktor müavini vəzifələrinin tutulması məqsədilə elan olunub.

Direktor vəzifəsi üzrə əmək funksiyalarına teatrın fəaliyyətini Azərbaycan qanunvericiliyinə uyğun təşkil etmək; yaradıcı və inzibati idarəetmənin həyata keçirilməsinə nəzarət etmək; teatrın strateji məqsədləri və planlarının, habelə büdcəsinin icrasına nəzarət etmək; repertuar siyasətini formalaşdırmaq; dövlət büdcəsindən ayrılmış vəsaitlərin təyinatı üzrə və səmərəli istifadəsinə nəzarət etmək; dövlət qurumları, yerli və beynəlxalq təşkilatlar, digər tərəfdaşlarla əməkdaşlıq qurmaq və teatrı təmsil etmək; tamaşaçı auditoriyasının genişləndirilməsi, marketinq və kommunikasiya strategiyalarının tətbiqini təmin etmək; əməyin mühafizəsi, təhlükəsizlik və etik davranış qaydalarına riayət olunmasına nəzarət etmək daxildir.

Direktor müavini vəzifəsi üzrə isə əmək funksiyaları yaradıcı və inzibati idarəetməni həyata keçirilməsini təmin etmək; strateji inkişaf planının hazırlanmasını və icrasını təmin etmək; yerli və beynəlxalq layihələrin, təşəbbüslərin hazırlanmasını və icrasını təşkil etmək; teatrın fəaliyyətinin səmərəliliyinin artırılması ilə bağlı təkliflər hazırlamaq; direktorun digər tapşırıqlarını icra etmək olacaq.

Namizədlərə aid tələblərə gəldikdə isə qeyd olunub ki, direktor vəzifəsi üzrə namizəd Azərbaycan vətəndaşı olmalı; idarəetmə sahəsində 5 il iş təcrübəsi olmalı; mədəniyyət və incəsənət ixtisasları qrupuna daxil olan ixtisaslar üzrə ali təhsili olmalı (idarəetmə sahəsində əlavə təhsili olanlar üstünlük hesab olunur), Azərbaycan dilini mükəmməl bilməli (digər xarici dilləri bilmək üstünlük hesab olunur); strateji planlaşdırma, maliyyə layihələrin idarə olunması və inzibati idarəetmə sahəsində bilikləri olmalı; liderlik, qərarvermə, analitik düşünmə, kollektivin idarə olunması bacarıqlarına, o cümlədən Azərbaycan incəsənəti, o cümlədən teatr sahəsində zəruri biliklərə malik olmalıdır.

Direktor müavini vəzifəsi üzrə namizəd də eyni zamanda Azərbaycan vətəndaşı olmalı; rəhbər və ya idarəetmə sahəsində iş təcrübəsi olmalı; mədəniyyət və incəsənət ixtisasları qrupuna daxil olan ixtisaslar üzrə ali təhsili olmalı (idarəetmə sahəsində əlavə təhsi üstünlük hesab olunur), Azərbaycan dilini mükəmməl bilməli (digər xarici dilləri bilmək üstünlük hesab olunur), strateji planlaşdırma, maliyyə layihələrinin idarə olunması və inzibati idarəetmə sahəsində bilikləri olmalı, komanda ilə işləmək bacarığı olmalı; Azərbaycan incəsənəti, o cümlədən teatr sahəsində zəruri biliklərə və MS Office proqramlarında sərbəst işləmək bacarığına malik olmalıdır.

Şəffaflıq.az