İranın İslam İnqilabı Keşikçiləri Korpusunun (SEPAH) Hərbi Dəniz Qüvvələri Fars körfəzində dörd gəmiyə zərbələr endirildiyini bəyan edib.

Şəffaflıq.az "Al Jazeera"ya istinadən xəbər verir ki, bu barədə SEPAH-ın bəyanatında bildirilib.

İran tərəfinin iddialarına görə, zərbələrdən sonra gəmilərdə yanğınlar baş verib. SEPAH həmçinin Hörmüz boğazının qərbində daha üç gəminin minaya düşdüyünü bildirib.

Bəyanatda ABŞ Silahlı Qüvvələri tərəfindən gələcək eskalasiyanın regiondakı ABŞ bazalarına birbaşa zərbələrlə nəticələnə biləcəyi barədə xəbərdarlıq yer alıb.

Kolumbiyanın şimalındakı Pelaya şəhərində polis bölməsinə dron hücumu nəticəsində altı asayiş keşikçisi yaralanıb.

Şəffaflıq.az-ın məlumatına görə, Sesar departamentinin hökuməti bu barədə "X" sosial şəbəkəsində bildirib.

"Bu səhər tezdən cinayətkarlar dronların köməyi ilə Pelayada polis bölməsinə hücum ediblər. Hücum nəticəsində altı polis əməkdaşımız yaralanıb", - bəyanatda deyilir.

Qeyd edilir ki, zərərçəkənlərdən ikisi ağır yaralanıb və xəstəxanaya yerləşdirilib.

Yerli hakimiyyət orqanları bildirib ki, hücumda iştirak edənləri axtarmaq və yaxalamaq üçün hərbi və polis bölmələri səfərbər edilib.

Hücumçuların yerini müəyyənləşdirməyə kömək edəcək məlumata görə 150 milyon Kolumbiya pesosu (təxminən 47 min ABŞ dolları) məbləğində mükafat vəd olunub.

Yaponiyada bir sıra dövlət və kommersiya saytları PHP proqramlaşdırma dilindəki kritik zəiflik səbəbindən işini müvəqqəti dayandırıb.

Şəffaflıq.az yerli mediaya istinadən məlumatına görə, bunu təsirlənmiş veb saytların administratorlarının məlumatları göstərir.

Xüsusilə, Maliyyə və Səhiyyə nazirliklərinin müəyyən bölmələri və onlayn xidmətləri müvəqqəti olaraq əlçatan deyil. Fasilələr internet xidməti provayderlərinin, kompüter oyunları tərtibatçılarının və yayım platformalarının veb saytlarına da təsir edib.

Yaponiyanın Milli Polis İdarəsi oktyabrın 21-də aşkarlanmış zəifliklə əlaqəli təhlükə barədə xəbərdarlıq edib.

Axşam saatlarında Baş nazir Sanae Takaiçi veb sayt sahiblərini dərhal lazımi təhlükəsizlik yeniləmələrini quraşdırmağa və bunu edə bilmədikləri təqdirdə saytların fəaliyyətini müvəqqəti dayandırmağa çağırıb.

Monteneqro noyabrın 1-dən Rusiya vətəndaşları üçün viza rejimi tətbiq edir.

Şəffaflıq.az xəbər verir ki, bu barədə Rusiyanın Monteneqrodakı səfiri Aleksandr Lukaşik TASS-a müsahibəsində bildirib.

"Monteneqro tərəfi noyabrın 1-dən Rusiya Federasiyası ilə Monteneqro hökuməti arasında ölkə vətəndaşlarının qarşılıqlı səfərlərinin şərtləri haqqında 24 sentyabr 2008-ci il tarixli sazişin qüvvədən düşməsi barədə bizə rəsmi bildiriş göndərib. Həmin tarixdən etibarən Rusiya vətəndaşlarının Monteneqro ərazisinə girişi üçün Monteneqronun, eləcə də Şengen ölkələri daxil olmaqla bir sıra digər dövlətlərin vizası tələb olunacaq", - o qeyd edib.

Tanker Omandakı Buxxa şəhərindən təxminən 20 kilometr qərbdə naməlum mərmi ilə vurulub.

Şəffaflıq.az "Ynet"ə istinadən xəbər verir ki, bu barədə Böyük Britaniyanın Dəniz Ticarət Əməliyyatları İdarəsi (UKMTO) məlumat yayıb.

İdarənin məlumatına görə, gəmidə baş verən yanğın söndürülüb, gəmi lövbər salıb.

Ekipajın bütün üzvləri təhlükəsizlikdədir, xəsarət alanlar barədə məlumat yoxdur.

Polşada 16 yaşlı yeniyetmə bir neçə nəfəri öldürməyi planlaşdırmaqda şübhəli bilinərək həbs edilib.

Şəffaflıq.az xəbər verir ki, bu barədə Polşa mediası hüquq-mühafizə orqanlarına istinadən məlumat yayıb.

Məhkəmə onun növbəti üç ayı yetkinlik yaşına çatmayanların saxlama mərkəzində keçirməsi barədə qərar çıxarıb. Daha sonra isə onun işinə ailə işləri üzrə məhkəmə baxacaq.

Polisə yeniyetmənin bir neçə nəfəri öldürməyə hazırlaşdığı barədə məlumat daxil olub. Onun mənzilində axtarış zamanı bıçaq, odlu silah kimi əşyalar aşkar edilib. Yeniyetmədə həmçinin gülləkeçirməz jilet və gözyaşardıcı qaz balonu da olub.

Ukrayna Prezidenti Volodimir Zelenski ABŞ dövlət katibi Marko Rubio ilə hava hücumundan müdafiə və gələcək əməkdaşlıq məsələlərini müzakirə edib.

Şəffaflıq.az xəbər verir ki, Zelenski bunu Rubio ilə telefon danışığının yekunları üzrə sosial şəbəkələrdə bildirib.

"Birincisi, həyatların qorunması üçün zəruri olan ballistik raketlərə qarşı mübarizə üçün ələkeçiricilərdir. İkincisi, Rusiyanın ballistik hücumları barədə həyati əhəmiyyət daşıyan vaxtında xəbərdarlıqdır. Üçüncüsü, həll edilməli olan Starlink/Starshield ətrafındakı vəziyyətdir", - o qeyd edib.

V.Zelenski vurğulayıb ki, bu məsələlərin müzakirəsi Ukraynanın Rusiya-Ukrayna müharibəsinin başa çatdırılmasına və insan tələfatının dayandırılmasına yönəlmiş diplomatik səyləri fonunda aparılır.

O əlavə edib ki, tərəflər yaxın vaxtda aktual məlumat mübadiləsi üçün yenidən əlaqə saxlamağa razılaşıblar.

ABŞ Prezidenti Donald Tramp bildirib ki, Vaşinqton və Moskva Rusiya-Ukrayna münaqişəsinin həlli üçün razılığa gələ bilməsə, istənilən vaxt Rusiyaya qarşı sanksiyaları sərtləşdirməyə hazırdır.

Şəffaflıq.az-ın məlumatına görə, Amerika lideri respublikaçı senator Lindsi Qremmin təşəbbüsü ilə hazırlanmış qanun layihəsi çərçivəsində yeni məhdudiyyətlərin tətbiqindən niyə imtina etdiyi barədə jurnalistlərin sualını cavablandırarkən belə deyib.

"Mənim bunu istənilən an etmək hüququm var. Dərhal. Buna görə də, əgər nəticə verməsə, hər zaman bu addımı ata bilərəm", - Tramp bildirib.

ABŞ Prezidenti əlavə sanksiyalar tətbiq etməyi hələlik planlaşdırmadığını, çünki Vaşinqtonun Moskva ilə danışıqları davam etdirdiyini vurğulayıb: "Danışıqlar apardığınız zaman belə etmirsiniz".

Amerika lideri, həmçinin respublikaçı həmkarlarının əksəriyyətinin yeni sanksiyaların hələlik tətbiq edilməməsi qərarına anlayışla yanaşdığını bildirib: "Mən qərarıma qarşı çıxan respublikaçılara mövqeyimi izah edirəm. Amma onların sayı azdır, çünki mənə etibar edirlər".

ABŞ-nin müdafiə naziri Pit Heqset İsrailə gizli səfər edib və ölkənin Baş naziri Benyamin Netanyahu ilə görüşüb.

Şəffaflıq.az xəbər verir ki, bu barədə "Axios" portalı məlumatlı mənbələrə istinadən xəbər verib.

Onların sözlərinə görə, görüş oktyabrın 19-da, bazar ertəsi günü baş tutub. Danışıqların təfərrüatları açıqlanmayıb.

Nəşr qeyd edir ki, Heqsetin səfəri ABŞ Prezidenti Donald Trampın 27 oktyabr 2026-cı ildə keçirilməsi planlaşdırılan İsrail parlament seçkilərində Netanyahunun namizədliyini dəstəkləməsindən bir gün sonraya təsadüf edib.

Bundan əlavə, görüş Vaşinqton və Təl-Əviv arasında İrana qarşı genişmiqyaslı hərbi əməliyyatların mümkün bərpası ilə bağlı danışıqların aparıldığı bir vaxta təsadüf edib.

ABŞ Prezidenti Donald Tramp Tehranın nüvə silahı yaratmaq imkanından məhrum olduğunu iddia edərək Vaşinqtonun İrana qarşı hərbi əməliyyatı dərhal başa çatdıra biləcəyini bildirib.

Şəffaflıq.az-ın məlumatına görə, Amerika lideri bunu Kanzas ştatında tərəfdarları qarşısında çıxışı zamanı deyib.

"Onların nüvə silahı ola bilməz və olmayacaq da. Kimsə dedi ki, ‘Siz elə indi gedə bilərsiniz". Bu, doğrudur. Biz elə indi gedə bilərik", – Tramp bildirib.

ABŞ Prezidenti, həmçinin 2025-ci ilin iyununda Amerikanın B-2 strateji bombardmançılarının İranın nüvə obyektlərinə endirdiyi zərbələri xatırladıb.

"Möhtəşəm B-2 bombardmançıları buradan çox da uzaqda olmayan bazadan havaya qalxdılar və bütün bombaları atdılar", – o əlavə edib.