Rusiyanın neft ixracının gəlirləri kəskin azalıb


 

Bu ilin yanvar-iyul aylarında Rusiyanın neft ixracından əldə etdiyi gəlirlər illik müqayisədə 37,7% azalaraq 43,9 mlrd. ABŞ dolları təşkil edib.

Şəffaflıq.az-ın TASS-a istinadən verdiyi məlumata görə, Rusiya neftinin ixracından iyul ayında 4,83 mlrd. dollar gəlir əldə olunub ki, bu da əvvəlki aya nisbətən 8%, əvvəlki ilin eyni ayı ilə isə müqayisədə 2,2 dəfə azdır. Bununla belə, fiziki neft ixracı təxminən 15% azalaraq 17,5 mln. ton təşkil edib. Yanvar-iyulda isə fiziki neft ixracı illik ifadədə 6% azalaraq 143,25 mln. ton olub.

Bundan başqa, "Qazprom"un 2020-ci ilin yanvar-iyul aylarında qaz ixracından əldə etdiyi gəlirlər 2019-cu ilin eyni dövrünə nisbətən 51,4% azalaraq 12,5 mlrd. dollara enib. Hesabat dövründə fiziki qaz ixracı da 17,6% azalaraq 104,6 mlrd. kubmetr təşkil edib. Təkcə iyul ayında Rusiya 1,07 mlrd. dollar dəyərində 12,4 mlrd. kubmetr qaz ixrac edib. Bu, aylıq müqayisədə dəyər ifadəsində 5,4%, həcm ifadəsində isə 10,3% azdır.

Rusiyanın neft məhsullarının ixracından gələn gəlirləri 2020-ci ilin iyul ayında aylıq nisbətdə 14,1% azalaraq 2,69 mlrd. dollar təşkil edib, rusiyalı neftçilərin xaricə benzin tədarükündən əldə etdikləri gəlirlər isə 56,8% azalaraq 86,4 mln. dollara bərabər olub. Ölkənin dizel yanacağı ixracından əldə etdiyi gəlir də iyul ayında 1,6% azalaraq 1,19 mlrd. dollar təşkil edib.

İyul ayında neft məhsulları ixracının ümumi həcmi iyun ayına nisbətən 27,5% azalıb və 10,5 mln. ton olub. 2020-ci ilin ilk yeddi ayı ərzində Rusiyanın neft məhsullarının ixracından əldə etdiyi gəlirlər illik nisbətdə 28% azalaraq 28 mlrd. dollara enib. Benzin ixracından əldə edilən gəlirlər 1,2% artaraq 1,5 mlrd. dollara, dizel yanacağından əldə edilən gəlirlər isə 26% azalaraq 12,3 mlrd. dollara düşüb. Bu dövrdə Rusiyanın ixracının həcmi 5% artaraq 85,2 mln. tona çatıb.
шаблоны для dle 11.2


Facebook-da paylaş